吳耀漢棄牙醫轉攻戲劇，畢業後加入英國廣播公司，曾演出過4部電視喜劇。
吳耀漢在車淑梅節目中除了大談自己的成長經歷及愛情外，亦提到自己的入行經過。他表示周梁淑怡當時幫襯他太太的髮型屋，之後獲對方邀請做幕後，當時他抱住貪玩，一試無妨的心態而加入無綫。及後老闆建議他自己度橋自己演，因而轉戰幕前。
吳耀漢因為周梁淑怡而再次踏足娛樂圈，更創下不少佳績。
他提到《點只汽水咁簡單》自己孭飛，全因當時有節目贊助商要求周梁淑怡「唔准用《歡樂今宵》啲人」開節目，對方當時想起自己，但向他表示只獲數百元酬勞。由於吳耀漢非常欣賞周梁淑怡，加上覺得是個機遇，決定接拍。其後無綫見收視不俗，有意添食，但人工無加幅，令他拒絕再拍。吳耀漢說︰「無綫由開台到今日，未試過好慷慨咁對佢哋啲藝員。『我要你上你就上，上咗你要多得我俾機會你上，所以你上緊，我已經俾機會你，仲要俾埋錢你？唔餓死你算好啦！』佢哋係咁樣嘅觀念，咁我咪叫佢去死囉！我唔會死，不過你死囉！」
吳耀漢自爆當年他的片酬有100萬。
其後吳耀漢把握機遇拍電影，用在髮型屋賺的錢去投資拍戲，親自寫劇本，票房大賣賺錢，並自資創立電影公司。其後周梁淑怡過檔亞視，再次邀他合作，更拍下《攪攪震》。他透露當時由林建岳話事，並跟對方「講數」︰「我同你拍呢個節目，總之係新嘢，我同你拍13集，合共3個月，即係我拍一部戲嘅時間，你要俾到拍一部戲酬勞我。前所未有，大家簽晒合約，唔准講出去，佢話俾人知道我俾幾多錢你就不得了。」他表示自己當時的片酬公價是100萬，最後他幫亞視拍了3輯，之後睇錢份上，再為林建岳另一節目，於是在亞視一年合共賺了400萬。然而，他因為投資電影失利而孭下一身債，最後更要變賣送給Susan的鑽石戒指還債。
吳耀漢自資拍攝電影《一枝光棍走天涯》失利欠落一身債，更要變賣太太的鑽石戒指還債。