黎明今日推出全新EP《重新唱VOL. 1》，重新灌錄3首舊歌。
黎明(Leon)剛推出全新EP《重新唱VOL. 1》，收錄歌曲《夏日傾情》、《越夜越有機》及《戀愛者聯盟》，他今日於Facebook發文，自嘲唱歌難頂，「舊年有一次坐人哋車，個人突然播出《夏日傾情》當年版，我一聽之下，即刻醒悟，甚麼叫做：『力拔山兮氣蓋世，唉！』聽返當日自己唱的版本，真係震過貓王，不停震，句句尾個隻字都震，我意思係啲震音～～講真一聽返連我自己都無法忍受，令我恍然大悟，鍾意聽呢首歌嘅朋友，我辛苦了你們的支持，真係要講句，對不起我愛你，為咗防止大家唔覺意再聽返當年的震音老土版，我覺得自己馬上需要重新錄製此曲。」
黎明自評從前唱腔老土難頂。
覆留言獲fans讚親民
之後Leon在留言區留言：「我此刻的心情非常複雜，又覺得自己際遇好奇特，我系介紹我的重新唱《夏日傾情》&《越夜越有機》的新EP，但有人分享iTunes訊息俾我，話恭喜晒我，夏日傾情上左no.1 但話我唱法同當年一樣，《越夜越有機》上到10位，我又點會唱到同當年一樣呢，一看之下原來no. 1 同第10位都係當年的版本，原來好多人撳錯咗啦，嗰個係我嘅陳年版，不是我的重新唱，請唔好比錯鼓勵，唔好再撳當年嗰隻，要聽就聽：《夏日傾情》(重新唱)。」fans都大讚Leon，「Leon你好可愛」、「第一次見到Leon覆留言好感動啊。」
與fans互動被讚親民。