Power Rangers回歸

要講《Power Rangers：戰龍覺醒》嘅來由，真係一匹布咁長。曾幾何時，無記同(已逝的)亞記都播過日本特攝劇《恐龍戰隊》，幾位著住唔同顏色緊身忍者裝嘅戰士，堪稱80後最重要童年回憶。

今次嘅reboot版電影《戰龍覺醒》，開拍前，片商Lionsgate需向原創者「日本東映公司」買版權，事關今次有別於95及97年兩部美版電影做法，改編美版劇集《Power Rangers》系列，反而選擇以日本93年(原裝正版)特攝劇為改編基礎。不過，雖則係以日版為基石，但美國片商要保住荷李活市場，始終都要保留番些少美國九十年代特攝劇《新恐龍戰隊》(Mighty Morphin Power Rangers)嘅特色，例如三男兩女成員組合及「Power Ranger」個名等。 

20年後再現大銀幕
一聽到《恐龍戰隊》系列要reboot，感覺就似翻拍《如來神掌》系列咁難，就算搵曹達華、于素秋演返，都極極極難拍得好。雖則此系列唔係未拍過電影版，成績亦唔錯，如95年由電視劇導演Bryan Spicer執導嘅《新恐龍戰隊 電影版》，就係成功嘅第一次(亦係唯一一次)。日本東映公司喺92年推出原版特攝劇，然後福斯廣播公司隨即改編(日版系列第16代至第18代)，93年喺兒童頻道播放美版特攝劇《新恐龍戰隊》，雖然被指係山寨貨，但意想不到咁受歡迎，一播就播足兩年，然後就有首部荷李活電影版面世。第一部電影版可以話食正劇集大熱條水，票房成績不俗，但事隔兩年，95年由Shuki Levy同David Winning執導嘅同系列電影《Turbo：A Power Rangers Movie》就出事啦，唔止俾fans鬧爆「似電視劇」，連票房都非常麻麻，所以reboot計劃一公布，唔少人都唔睇好。

換新裝
要改編特攝片，難度頗高，既要保留原著陣除，亦要拍出現代感。(試問，以恐龍戰隊套戲服，點樣可以唔改設計而又有美感呢？)新版電影選擇加入全新風格嘅電腦特技，之不過，《戰》舊年發布海報及角色造型照時，因新戲服改成了半透明水晶盔，同原版完全唔同，令到極多fans反感；而反派方面，麗塔女王亦著上全身戲服示人，從預告可見，佢嘅攻擊將會配合眩目視覺效果；至於故事方面，相信係最保留原著嘅部分，新版同舊版大致相同──一班年輕學生被選中對抗女王等反派，唔同嘅係，今次除咗「打怪獸」之外，仲會用部分篇幅講述佢哋真實生活所遇到嘅問題。姑勿論大家鍾唔鍾意新版風格，點講都係20年經典再現，都值得入場一睇嘅。

◆《Power Rangers：戰龍覺醒》上映日期：即日◆