193、肥仔和George出席《公司逼我打籃球》記者會，再以「PUZZ!3」限定組合形式受訪。(娛樂組攝)
ERROR成員郭嘉駿(193)和梁業(肥仔)和歐鎮灝(George@P1X3L)，聯同王家晴(Candy@COLLAR)、ROVER成員陳鎮亨和王希晉、田曜減(Tsoul)、陳安立、曹梓冲(Agent L)以及文卓森(旁日君)，今日出席ViuTV全新節目《公司逼我打籃球》記者會，193、肥仔和George以「PUZZ13」限定組合形式受訪，談到在球隊「愛晴當入樽」的角色時，擔任隊長的193自認「冇擔當」，「我負責威嚴，面門擔當，企出嚟未必係做嘢嗰個。」肥仔自認是球隊的「波」，George就自封為「燶」之擔當，因踢波扭傷腳無法出賽。
唱「跌崩一棚牙齒」
其實他們為受訓都各自受傷，193自言腰傷仍未痊癒，「執唔到番梘。」更即席示範，並大爆肥仔借醫師之名，「有次練波，佢話醫師叫佢唔好打波。」肥仔呼冤，僅只一次就經常被拿來作話柄，並指因跳舞累積不少舊患。雖然各有傷患，但他們表示拍攝期間，一班男生有不少深情對話，193爆料：「好多人都唔著衫，肥仔仲要著三角底褲，唔好意思，係平腳，不過佢肥，搞到似三角，好似上下身到冇著。」
接著話題一轉，開展「暴走式」訪問，三人投訴ROVER主唱節目主題曲，肥仔問道，「點解唔搵我哋PUZZ13唱主題曲，(193答道：我哋跌崩一隻牙齒)我哋係跌崩一棚牙齒。」3人隨即扮無牙唱歌，自己都忍唔住笑。193乘勢問George和肥仔尚餘多少年合約，揚言要以「3天下」公司之名，簽兩人加盟正式組成「PUZZ13」，George認真細想，193即喝止：「你唔好諗住真係講！」接著他強調只簽George，不會簽Phoebus和Marco。
口窒窒談黃秋生
談到George日前與黃秋生受訪時中伏，被問到電影《不赦之罪》配樂時，竟答「波多野結衣」，他解釋：「其實唔係我想講，因為波多野……一定好自然諗到結衣。」193雖嘲笑他追不上AV潮流，但亦認為這是男人的正常答案，George坦言，「我都有問秋生哥，仲乜俾個氹我。」搞笑地獲秋生讚：「你叻仔，你幾好玩喎！」問他如何回應時，George口窒窒答道，「下次唔好俾咁大個窿，細啲好啲，(肥仔問：你唔鍾意咁大個窿？)係氹，唔係個窿！」談到最近忙於謝票，193笑言周圍都見到George的強姦犯海報，George就自爆：「因為做咗強姦犯，啲客唔再搵我。」193和肥仔即時爆笑。
指保錡狀態fit咗
問到P1X3L的隊友Phoebus和Marco都未看George首次擔正主演的電影，George亦未看Phoebus的音樂劇，193即時施展離間計，「你哋都唔respect對方，可以即刻拆黟，加入我哋PUZZ13！」最後，問到ERROR早前與ROVER合作的綜藝節目，保錡亦有現身，193和肥仔表示卿目在近一、兩個月前拍攝，ERROR一直也有工作，包括籌備製作團歌，問到保錡日前出po惹來網民議論，兩人就表示不能代對方回應，193表示。「睇IG見佢狀況OK，因為成日都做運動，做運動正常有安多酚，令自己熱血沸騰好開心，同埋佢身形比之前fit咗好多，比以前勤力許多做運動。」問到保錡可有要求出席公開活動，193就回應，「講真，其實佢有講過話不如休息一陣先。」接著他與肥仔就笑言，不用找保錡，可以找PUZZ13，接著3人齊齊搲撈。