《葉問5》宣佈開拍 網民瘋狂度橋點令葉師傅翻生
呢期係康城影展，除咗紅地氈同埋競賽電影角逐各個大獎之外，亦係唔少片商賣片嘅時間。尋日，打造《葉問》系列電影嘅東方影業宣布即將開拍三套同甄子丹合作嘅新片，當中包括《葉問5》。
《葉問》由2008年面世以來，票房同口碑都唔錯，再拍新一集都無可厚非……咪住！《葉問4》已經交代葉問師傅因癌症逝世啦噃！唔少網友都提出呢個疑問，仲一齊度橋《葉問5》會點樣安排葉師傅出場。
其中有人提議好似《無間道3之終極無間》嘅梁朝偉咁，喺片中以回憶片段出現。喺馬來西亞嘅「檳城葉問詠春拳法學會」facebook專頁，都提出類似睇法，認為第3集入面，葉問剛剛收李小龍做徒弟，而第4集李小龍去咗美國，於是第5集可能就係講述李小龍返港同師傅學習嘅故事。
至於電影公司老闆黃百鳴受訪時表示，佢同甄子丹都希望親解箇中原因，喺《葉問》15周年再拍一部，而佢哋都有共識唔想重複，要等劇本搞掂先再公布。
原文刊登於 Yahoo 娛樂圈
