《鐵探》劇情愈來愈緊湊，收視口碑俱佳，除了劇本引人入勝，一班老戲骨包括演Madam Man的惠英紅、Bingo姜皓文、賤Kan許紹雄，在劇中將角色演得絲絲入扣之餘，幾位高手「過招」時又暗自較勁，在幾場鬥戲中併發激烈火花，令劇集推上更高檔次。
劇中飾演伍警司的陳志健(Otto)，既是Madam Man的下屬亦是心腹，無論上司決定是對是錯，Otto必定言聽計從，因此被網民封為「小伍子」、「伍跟班」。對於在《鐵探》中，能與紅姐日夕相對，Otto坦言感到榮幸，甚至有彷如中六合彩的感覺，說：「今次好幸運可以同紅姐合作，初初接劇本，知道可以同佢有唔少對手戲時，覺得自己好似中頭獎咁，因為未試過同影后級人馬做對手，又可以喺黑哥(姜皓文)、Benz Sir(許紹雄)身上學嘢，而Benz Sir同紅姐嘅演繹手法亦好唔同，即使要喺佢哋身上偷一半師，相信都要花好長好長嘅時間同磨練，所以覺得今次自己執到支好籌。」
在Otto眼中，紅姐是一個親民大姐姐：「紅姐演戲時嗰股氣場真係好勁，同佢做對手，你會不自覺俾佢牽引住，情緒要好耐先平伏到。不過私底下，紅姐其實好nice，等埋位嗰陣，佢先會同我哋溝通，講吓下一場戲應該要點做，拍呢套劇嗰陣，紅姐啱啱先攞到金像、金馬影后，佢仲專登帶咗《血觀音》套戲嘅DVD送俾我哋，佢真係一個值得後輩尊敬嘅前輩藝人。」
