單文柔首度確認已離開效力近十年的無綫，回復自由身。
曾參選港姐的單文柔（Phoebe)，與陳展鵬結婚育有女兒「小豬比」後，生活重心一度放在家庭，幕前工作不多。近日，她亮相陳敏之主持的網上節目《Chi Chat》時，首度確認已離開效力近十年的無綫，回復自由身，並宣布踩入商界，推出籌備兩年多的個人護膚品牌。她希望藉創業尋回自我，也為女兒示範何謂堅持。
視挫折為身教
單文柔透露品牌前後花了兩年多籌備，由物色外國原料、包裝設計到產品定位均親自參與，求學時的美術底子亦大派用場。而在創業路上她屢遇阻滯，但就認為這些失敗經歷正是向女兒最好的身教：「做每件事都需要付好大努力，即使失敗都唔好放棄。」她憶述起初為女兒製作手工皂及濕疹膏作送給同學的小禮物，後來慢慢萌生創立自家品牌的念頭：「好想做一個品牌，代表住我哋屋企，代表有小豬比，有展鵬，有我哋，一個好有愛嘅屋企，但係件事點包裝呢？ 呢粒小種子埋藏喺我心裡面好耐。」
拒被家庭標籤框住
單文柔坦言曾因外界只標籤她為「陳展鵬老婆」或「小豬比媽咪」而思考自身價值，「其實我好愛我家人，我唔介意呢啲身份，但會諗我會唔會慢慢好似遺忘咗自己呢？有一日叮咗下，其實我唔會冇咗我自己，而家喺豐富咗我自己嘅人生。」 她亦希望品牌未來或可交給女兒或共同營運，「我覺得我嘅人生閱曆好似唔係好夠，我好想自己之後有啲嘢係可以俾到佢，例如我有個品牌，如果佢有興趣，我又可以俾咗佢，或者大家一齊做。」