Coffee林芊妤出席活動，交代胎兒染色體報告情況和懷孕心情。(娛樂組攝)
35歲林芊妤(Coffee)早前在社交平台宣布懷孕4個月，但進行無創胎兒DNA「T21測試」，發現染色體13或有問題，或可能導致BB兔唇、多一隻手指、腳趾，或者智力有問題等，甚至小朋友或活不到1歲，是嚴重的染色體問題。日前她又再拍片表示，在美國的檢驗報告有好消息，胎兒的腦部，血管、眼鼻耳身體都沒問題。
今日她與6歲兒子翟德彥(伯伯)於九龍灣出席親子體驗劇場活動，她受訪時再交代報告情況和懷孕心情，她表示雖然有好消息，但仍未放下心頭大石，曾經歷流產的她仍掙扎應否驗羊水，「醫生話假陰性的機率是萬分之一，但抽羊水早產或流產的機會是0.05%，佢話我唔係一個好叻佗仔嘅人，因我頭一胎有胎盤前置和出血，今次頭3個月都有不停出血。」在醫生建驗下，她和老公決定暫不冒險抽羊水，但會再做一次檢查。「下個禮拜一就會有結果，我而家又返到去矛盾個心情，我相信我呢個矛盾嘅心情都會去到生（BB）為止。」
直認情緒受影響
曾經流產的Coffee直言有點驚恐情況，起初也不太自覺，但看YouTube留言才開始意識情緒或出現狀況，「佢哋都會擔心我係咪有少少產前抑鬱，已經有少少嗰種，覺得自己唔OK，都真係嘅，因為我會無啦啦揸車會喊，可能會做做吓嘢，個人out focus會諗，即係我會無啦啦流眼淚。我覺得係一個先兆，咁所以我自己都應該去stop呢件事，雖然我好想佢stop，其實我一路都冇發洩出嚟，因為我唔想身邊嘅人擔心，所以當我拍片嘅時候喊，我自己都不能理解。」她表示不後悔拍片公開狀況，因收到很多鼓勵和有經驗的媽媽分享意見心得。
暫沒打算諮詢心理醫生
問到會否諮詢心理醫生意見，她就表示暫未有考慮，「我本身係一個開朗嘅人，我係一個好硬淨嘅人，所以我覺得自己發覺到，呢個係因為荷爾蒙帶嚟嘅問題，而呢個報告又帶嚟嘅問題，所以導致有咁嘅諗法。我知道，我有呢個信心， BB再check埋嘅時候就會再安心啲，我個情況就會好啲。」
兒子曾呷醋 承諾愛錫BB
訪問期間，兒子不時走入鏡抱著Coffee，拍攝時又與媽媽Kiss，非常sweet，問到兒子可知道到情況時，Coffee自言沒有親自告訴兒子，但囝囝從大人的言談中，已略知一二，「佢之前唔想要呢個BB，佢唔開心，知道BB有問題好開心，『Yeah！BB有問題！』但知我唔開心就同我企同一陣線，佢話你唔好唔開心，我會錫佢架，為咗我忍受呢個情敵爭媽咪，但我都話會一樣咁錫佢。我仔好驚我喊，一見到我喊就叫媽咪，唔好喊啦，跟住就遞紙巾，我咩都應承。至於老公翟志榮又如何，Coffee表示，「我老公係一個唔係好識表達自己的人，好man嘅人，但陪伴好重要，佢每次檢查佢都希望喺我身邊，唔想我自己一個人面對。」
立即更新/下載AM730手機APP 體驗升級功能
