MC張天賦新歌《Overkill》首次挑戰跳唱，在MV中大玩dreaklock造型。
出道短短兩年，MC張天賦不斷挑戰風格多變的作品，更於明年踩上紅館開個唱，而今年最後一首派台作品《Overkill》正是《This is MC》演唱會主題曲。MC首度挑戰跳唱，配合暗黑曲風及強勁節奏，盡顯霸氣與自信。MC早於10月開始已為拍新歌MV排練舞蹈，沒想到當日拍攝第一個跳舞鏡頭就因為踩空而拗柴跌倒！雖然腳腕又腫又痛，但MC非常專業，稍作包紥就繼續拍攝，由早上6點開始拍至翌日早上7點，拍足25小時，頂住腳痛跳唱約20個鐘亦毫無怨言，將「亦正亦邪」氣質發揮得淋漓盡致，舞技演技大躍進。MV將於明晚(28日)首播。
奉上多個「第一次」
MC坦言，「今次應該係我咁多個MV之中最鍾意嘅其中一個啦！呢次打破咗我好多第一次，我第一個最大製作嘅MV、第一次連續要拍攝廿五個鐘頭、第一次拍攝受傷、第一次拍MV時候要唱歌，而且亦都係第一個最辛苦嘅MV，廿五個鐘頭真係好長，中間我可能只係瞓咗半個鐘左右，我真係無瞓過覺，全日都幾乎係一個亢奮狀態，因為我都想件事可以做得好啲，成個畫面會出嚟會靚啲，我都擔心一瞓我就會開始腫，個狀態追唔上，所以一路都盡量同自己講唔好瞓覺。同埋，個MV我食咗好多嘢！食咗好多餐！哈哈。」
談到受傷，MC話，「 應該係第一個shot已經拗咗柴，當時我諗應該捱到廿個鐘頭⋯⋯但個傷好反覆，工作人員買咗止痛噴霧俾我頂到一陣，所以成晚我感覺係不停由唔痛去到痛，再唔痛又去返痛咁....。」經過今次嘅教訓，MC表示以後要跳舞，演唱會時都一定會選一啲合適自己動作嘅服裝同鞋，因為原來真係好大影響，「一來，拍攝場地又因為地面濕滑啦，所以大家真係要「小心地滑」喇！二來就係對鞋實在太高，所以一旦唔小心踩空就會出現扭親現象。」
《Overkill》歌詞裡面 : 「 有痛要痛到過度」 ，這次豈不是實現了歌詞的「痛到過度」感覺？ MC笑言，「喺我嘅記憶當中呢個應該未去到最痛嘅，最痛應該暫時對我嚟講係紋身⋯⋯吖唔係，係紋眉⋯⋯吖唔係，係紋完眉要洗眉呀⋯⋯哈哈。」這次MV角色亦正亦邪，非常配合歌詞「有喪要喪到過度」，MC笑言，「我絕對係一個喪嘅人！當翻睇返MV嘅時候，我都覺得自己有好多鏡頭係好意想不到，好邪惡好狡猾……幾有型。現實之中我係一個 all in or nothing 嘅人，即係都幾喪吓嘅！」
Dreadlock造型暗藏密碼
MV中MC轉換了4個造型，更首次嘗試dreadlock 頭，「其實真係以搏一搏嘅心態去整嘅，但我好信任我嘅髮型師阿鬼，亦都好信任我嘅stylist Anson，所以決定整咗。整完出嚟效果非常之好，配合埋服裝同埋背景我覺得錦上添花咗。仲有一個幾有趣嘅事，整dreadlock頭，大家覺得塊面好似咩都無，有啲寡喎，於是就叫化妝師幫我喺面上畫一啲嘢，一開頭我哋揀咗啲符號，但又擔心啲符號有一啲我哋唔希望有嘅意思或者我哋未完全明白個圖案，所以唔敢輕易擺喺面度，最後我哋就決定是但寫一堆羅馬數字，於是揀咗16嘅羅馬數字「XVI」，但意思係咩呢……我就唔話俾大家聽喇！大家自己估吓囉。」
