仲有唔夠一個禮拜就係MIRROR演唱會開鑼日子，早排瘋狂搶飛嘅鏡粉近來開始收到飛，不過未入場已經有唔少疑惑。
有fans喺MIRROR歌迷群組入面留言，表示張飛上面寫明係「視線受阻位置」，有人問係咪最平嘅$480，點知原來係$1,280最貴嗰隻！有心水清嘅鏡粉估計，視線受阻係因為座位對正連接場館高處燈光同音響設備嘅電纜，所以會遮住。問題係，其他演唱會可能中價飛同山頂位先有咁嘅情況出現，MIRROR演唱會連貴飛都遇著「電纜位」，可能本身位置都離舞台較遠。
另一位fans亦反映，佢透過官方歌迷會途徑買尾場$880中價飛，點知係坐32行山腰位；但係有朋友公開售票時搶到同一場嘅飛，居然可以坐前3行。
今次買飛嘅安排搞到唔少鏡粉好氣餒，相信到開show之後，因為實名制而檢查門票嘅過程、發售紀念品等程序安排，都可能會令鏡粉有意見。
原文刊登於 Yahoo娛樂LOL，am730獲授權轉載
【立即參加】送Rollink全球最輕薄可摺疊手提行李箱🧳！
