《中年好聲音》十強之中，聲音最具爆發力嘅林鉫徫(Jay），亦係網民攻擊對象之一。上一集演唱前，佢喺訪問中提到負評時都眼濕濕，「睇完我自己都要啲時間去消化。通常講我肥，或者唔知我係男定女，或者合唱時會覺得我係唱得好好，不過話唔想睇到個畫面」。
38歲嘅林鉫徫其中一份工作係歌唱老師，但係中性打扮同唔少人心目中「音樂老師」形象有出入，佢話試過有家長要求老師「一定要長頭髮同着裙，先會畀小朋友跟呢個老師學」。呢件事令鉫徫深深不忿，亦希望透過節目為自己平反，唱歌係無關外形同性別。而鉫徫之前選唱《好人》就係希望能夠保持善良，做一個好人，而且學會愛自己多啲，唔會理人地目光。
曾推出個人專輯
林鉫徫參加《中年好聲音》前已經身經百戰，2016年參加廣東電視台主辦嘅《麥王爭霸2016》成為香港十強代表北上出賽，2018年喺《中國新歌聲》港澳地區海選奪得季軍，更試過獲音樂人趙增熹推薦，為迪士尼電影《獅子王》錄製粵語版開場曲《循環不息》。鉫徫同時亦有製作個人作品，推出過個人專輯《拓荒者》。參賽後鉫徫人氣反彈，佢早排更分享有唱片鋪將佢幾年前推出嘅專輯拎返出嚟賣！
原文刊登於 Yahoo 娛樂圈
