何超盈重拾fit爆身形 為4歲囡囡大搞Barbie生日派對

已故賭王何鴻燊四房長女超盈於19年誕下囡囡「荷包蛋」辛阡覓Audrey，轉眼已經4歲。超盈日前在豪宅為囡囡大搞生日派對，並以非常hit的Barbie作為主題。

Audrey三歲生日時，超盈為她整了一個吹氣城堡，以公主做主題，非常有氣勢。今次亦不馬虎，請來兩位金髮女郎以一身Barbie打扮出現，並跟小朋友玩遊戲，室外更有一個泡泡池，見到小朋友都換上泳衣在充氣滑梯玩得非常開心。生日現場有大量粉紅色氣球布置，壽星女至少換上兩套衣服，媽媽超盈亦同樣以兩個造型出場，分別是黑色吊帶causal打扮，另有粉色閃閃套裝。

超盈變索媽

出席生日派對的除了有Audrey的朋友仔，超盈亦邀請了林恬兒、莊思明、莊思華、彭慧中等。一眾名媛的手袋亦是配襯返生日主題，從照片見到超盈手上的是鮮桃紅色的鱷魚皮的Hermès Kelly Mini。另外，超盈自做媽媽之後，身形時肥時瘦，但今次所見，她已變回索女，手腳非常纖瘦。