王卓淇自爆內地拍劇收入不及TVB。
現年32歲的王卓淇（Erin）2014年勇奪香港小姐亞軍入行，至2021年離巢TVB轉戰內地做KOL，不時拍片分享娛樂圈事件及於TVB的遭遇，她曾自爆當時在TVB第一個月人工僅得$7,000，離巢前人工才升至過萬，完全不夠生活，租屋食飯都成問題所以才決定離巢。日前，王卓淇就拍片大談拍攝TVB劇集及內地短劇片酬的分別。
王卓淇日前客串前TVB藝人何君誠有份投資的內地短劇，並自爆收入不及TVB：「大家成日話TVB嘅收入唔高，喺香港嚟講係唔高，但係同內地短劇比呢，其實係OK㗎喎。因為呢度嘅成本係幾百蚊一集㗎咋，幾百到幾千，你好紅嘅短劇演員都係幾千蚊一集，除非你係一線呀，可能佢有一兩萬一集，但係一般都係幾百蚊一集嘅啫。所以TVB都有……一千幾千一集，仲低囉呢度！唔係最差㗎其實TVB，平反一下先。」
不過，王卓淇就大讚拍攝過程相當好玩 ，並解釋內地短劇成本低、製作快、收益高，而且拍攝過程比較輕鬆，講錯對白都可以靠後期剪接，而一套短劇只需要六日就拍完，她表示：「港劇係要拍一套戲至少三個月，其實唔止港劇，我相信好多內地劇都係拍三個月到半年，但係佢哋係可以六日拍完一套，好犀利，90集囉，當然一集係分零鐘，但係好勁囉呢個效率！」
