Edan演唱會公售兩場門票售罄，今日出席活動時，大批「爵屎」高呼加場。(娛樂組攝)
MIRROR成員呂爵安(Edan)今日(3日)現身尖沙咀，出席《魷魚遊戲3》聯乘活動，在主持人小儀帶領下，Edan與大學室友、早前首奪亞錦賽冠軍的香港劍擊運動員蔡俊彥(Ryan)，齊齊與fans玩遊戲。Edan個唱今日中午公售，門票在兩小時內已售罄，他亦有親自嘗試購票，但不及fans快，空手而回。Ryan直接問Edan要演唱會門票，Edan亦爽快答應，問到可會加場時，Edan直言要視乎場地，「想起碼加到一場先，(想突破上次紀錄嗎？)如果可以梗係想，我諗都應該handle到。」大批fans毋懼炎熱天氣，早已到場守候。
蔡俊彥叫Edan台上除下身
Ryan隨即叫Edan除衫為「爵屎」謀福利，Edan反叫Ryan在台下除衫，Ryan秒回：「我喺下面除上身，你喺台上除下身！」Edan笑言無所謂，下半身可以除鞋。兩人坦言自上次同場出席活動後，已沒有見面，但互通短訊好sweet，談起以前同住宿舍的生活，他們笑言主要是打機和「健身」，Edan笑言，「嗰時玩『廣東健身』(打麻雀)，佢(Ryan)係德洲健身專家。」
與李帝勳合作 感覺夢幻
Edan首次參照韓劇《模範的士3》，與韓國視帝李帝勳合作，他興奮表示，「十分榮幸，好夢幻呢件事，可以見到自己有睇開嘅韓劇演員本人，因為其中一套我最鍾意睇嘅韓劇係他主演的《解碼追兇》(Signal)，有呢個機會都好開心，咁啱呢個角色同佢有幾多對手戲，好好把握呢個體驗，好難忘。」Edan表示主要講英語對白，Ryan立即請他示範，Edan以英語回應，笑指經過多次練習，已能操流利英語。談到李帝勳對他印象時，曾獲崔始源「加持」讚靚仔的Edan笑言，「佢有讚我好靚仔！」然後才認真表示，「佢十分之客氣，佢係超級客氣嘅前輩，十分有禮貌，讚到你天上有地下無，佢話：『You are very good actor！』」說罷他也忍不住笑，「見識到對方嘅專業。」
姜濤Anson Lo如常排練
MIRROR將於本周六(5日)參與亞博的演唱會，問到Anson Lo手術後情況時，Edan表示，「佢好返好多，我尋日見佢已經可跳舞，大家唔使擔心。」至於從法國回港的姜濤，Edan回應：「佢都一切如常，大家唔使擔心。」Edan表示得知姜濤墮海獲救當晚，也有發訊息問候，但如舊沒有回覆，談到姜濤有回覆Tyson Yoshi和Gareth. T，Ryan即幫口表示，「Edan都唔覆我，friend先唔使覆。」
爭取「安蔡」組合拍節目
Ryan早前首奪世界錦標賽冠軍，世界排名由17上升至12，Edan亦有發訊息祝賀，Ryan坦言，「呢一刻係好開心，運動員好現實，有獎就少啲壓力，我終極目標係世界排名可以上到第一位，呢個係我起初做職運動員嘅初衷，之前因為低潮放低咗，希望可重拾自信追逐呢個目標。」兩人早前曾表示想合作拍綜藝節目，Edan公開呼籲贊助商，爭取以「安蔡」組合形式拍節目，笑言可拍不同種類的「健身」節目。
ADVERTISEMENT
20周年「全城撐本地消費3重大激賞」！ 即睇活動詳情！
