周杰倫三場啟德個唱開鑼。
台灣天王周杰倫(周董)的《嘉年華世界巡迴演唱會2025》香港站，星期五一連三晚假啟德體育園主場館舉行，實在一票難求，首場當然亦座無虛席。
周董首踏啟德主場館舞台，先以《黃金甲》開場，之後他有大曬廣東話，並講：「香港嘅朋友，大家好呀！係咪好掛住我呀？我都係好掛住你哋。」又問：「我嘅老粉喺邊度？」台下觀眾立即報以熱烈的歡呼聲，他笑言「老粉」應該會想他的老歌，所以全晚周董亦有唱出早期作品，包括《簡單愛》、《安靜》、《開不了口》、《七里香》等，期間周杰倫還走落台跟歌迷握緊大派福利，有網民於社交平台炫耀稱「一晚摸到兩次周杰倫」，令不少網民羨慕不已。開騷前，周董在IG限時動態分享於私人飛機上的照片，除見到周媽媽外，更見到旁邊正是日本男神山下智久，一行人從台灣啟程到港，並寫上「香港 我們來了」。雖然山P未有為周董啟德個唱頭場站台，但據悉山下智久將會擔任第二場的特別嘉賓。
