2025-07-04 11:28:16

女神配對計劃｜李芷晴蒙眼測試三組員膊頭好枕度怕醜男Jacob激到阿Bob掟耳機

由林盛斌（阿Bob）擔任金牌媒人兼主持的無綫戀愛綜藝真人騷《女神配對計劃》，後日（6日）晚九點播出第五集，本集與組員進行「三角枱約會」的女神是李芷晴及羅毓儀（Yuki）。

上周憑一身吊帶白色低胸晚裝裙贏盡焦點的李芷晴（Step），今集將再度強勢出擊，在節目中無限量放送「女友力靚樣」表情包，極有潛力再掀熱討！Step組的三位求愛勇士分別為年薪超過80萬的「怕醜仔」金融分析師林焌堯（Jacob）、陽光型保險經紀劉偉強（Isaac），及貼心西裝店老闆陳昇（Jaden），而三人要面對的關鍵字回合考驗分別是「口味」、「冧」及「舒服」。Step還會在是次約會中公開3大實質擇偶條件。

三人之中以先天性追女仔方面勁多不足的「怕醜仔」Jacob最為搶焦，不但全程製造勁多Dead Air，還數度拒絕俾視線女神！當中最爆笑一幕，是Jacob一度嘗試抖大氣「儲氣」發言、可惜最終卻極速洩氣繼續頭耷耷，未知是否含蓄表現夠清純，Step對Jacob似乎頗為受落，雖然明知「我哋都係繼續Dead Air」，但仍是忍不住連環大讚Jacob「好搞笑」。另一搞笑位，是當Jacob發現自己對著Step語塞時，不但問對手「有冇嘢問」，還出人意表地撩對手Jaden傾偈，令Step亦大開眼界謂：「佢開始撩你哋（指Jaden及Isaac）喇」，說畢更「破防」豪邁大笑！至於被Jacob睇中的Jaden，則好心苦勸Jacob要珍惜機會：「你咁好機會，快啲問（Step）問題啦！」

阿Bob爆笑肉緊

面對Jacob的「消極」，主持兼媒人阿Bob表現得既肉緊又激氣，眼見Jacob主動將機會轉贈對手時，阿Bob連珠爆發谷氣謂：「你話死唔死吖，有冇嘢問喎」、「問你呀，你問咩人哋啫」，之後在第一回合結束後，阿Bob更馬上嚴師上身向Jacob訓話：「Jacob，你嘅時間嚟㗎嘛，你問佢哋有咩想問？你冇嘢呀嘛？等陣佢哋有機會㗎啦！」而當見到Jacob再反高潮地轉撩對手傾偈時，阿Bob直頭激動到掟耳機兼一支箭標去約會現場救駕，而花生團的江美儀及黃嘉雯亦忍不住大表肉緊謂：「叫佢唔好再咁喇。」雖然Jacob追女仔零板斧，但卻憑真心及努力取勝！事緣Jacob知道自己入組芷晴隊後，竟認真地狂煲Step在《愛‧回家之開心速遞》中的戲份、還大讚Step飾演的Elaine好好睇，令Step大為Impressive，Step更因而自揭：「Elaine其實應該係有八至九成都係我嚟。」而在之後為Step改「情侶匿稱」的環節，原本率先答題的Jaden及Isaac已給出了極冧滋答案，豈料威力卻不及Jacob的「楊枝甘露妹妹」！雖然「楊枝甘露妹妹」聽落莫名其妙，但原來靈感是來自Step《愛‧回家》其中一個角色，Jacob說：「我睇咗佢有一集《愛‧回家》，係佢喺吳多國嗰度做人哋Assistant，個角色叫楊枝甘露，嗰個角色令我覺得好冧，可愛得嚟又好純情。」

對於Jacob為了自己狂煲《愛‧回家》，Step坦言很窩心：「可能其他人係未必知（我有個咁嘅角色），嗰吓我會覺得係『得我一個知道你講緊咩』，我就有啲心動，我會覺得：『嘩！點解你會記得嘅？』…佢真係有留意李芷晴嘅嘢，我有嗰種被放咗喺心上嘅感覺。」被Jacob的真摯、傻氣及靦腆深深吸引的芷晴，飯局期間還一再為Jacob打氣，互動相當甜蜜！

Isaac衰太積極

三人之中，以Isaac最為積極，在Jacob的Dead Air時間多番「執漏」向Step主動提問，除了大拋自己對Step的了解之外，又技巧地問一些會氹到Step的問題，追求手段高超，可惜卻反而被Step扣分：「Isaac嗰種Aggressive又唔係咁舒服，會有少少扣分。」看來太進取的男人未必是Step杯茶。

今集的動作題是第三回合的「舒服」，抵死的製作組竟想到要Step蒙眼測試三位求愛勇士膊頭的「好瞓度」！面對如此親密接觸，「怕醜擔當」Jacob自然硬晒軚兼再度化身「比薩斜塔」；不過原來Jaden及Isaac也一樣怕醜，前者嚇至傻笑兼「紅都面晒」，後者則被發現「震過貓王」。