2025-07-05 18:00:14

女神配對計劃｜林俊其追羅毓儀之路一波三折親揭六年前因拍劇一見鍾情

由林盛斌擔任金牌媒人兼主持的無綫熱播戀愛綜藝真人騷《女神配對計劃》，明天（6日）晚上9點播出第五集，本集與組員進行「三角枱約會」的女神是李芷晴及羅毓儀（Yuki）。

江美儀睇得肉緊

在《女神配對計劃》第二集中以「I人Style」（內斂又含蓄的方式）真誠向女神羅毓儀（Yuki）表白的林俊其（Kris），今集終於隆重登場，向心儀多年的Yuki火力全開猛烈追求！Kris在節目中幾經Yuki追問下，終揭出原來早於六年前已對Yuki一見鍾情，事發地點是劇集《伙記辦大事》拍攝現場。Kris：「我好記得真係，《伙記辦大事》」Yuki：「咁耐之前？」Kris：「嗰次真係我第一次見你，你係（演）陪審團，跟住你一嚟到時，咁啱我就望到，『嗯？！呢個女仔…幾好』」說畢，更向Yuki送上一個迷人電眼，令Yuki忍不住用甜到漏的聲線反問：「真咩？…」眼見Yuki看似被攻陷，Kris再出多兩錢肉緊：「跟住我（嗰日）成個注意力放咗喺隔籬（當日Yuki所在位置）。」此話一出，就連花生團之一的「Yuki唉吔媽咪」江美儀亦高呼：「唉吔，冧死！」Kris還會首揭為何在過去六年對Yuki的愛意斷斷續續，以及會拖到今時今日才鼓起勇氣表白。

Kris直認過程好kick

雖然Kris簡單一個愛苗萌芽故事冧掂大小Target，但並不代表他與Yuki發展順利，觀乎節目更是名副其實「一波三折」！首先，對於Kris情深的「愛的解釋」，Yuki基本採取半信半疑態度；本著「愛是懷疑」，Yuki向Kris一口氣提問了大量問題，令Kris不懂解釋的同時，花生團亦很肉緊。江美儀：「好老尷呀佢兩個！」黃嘉雯：「因為Kris做每一步都好小心翼翼。」江美儀：「佢諗太多喇！」就連Kris本人，亦覺得追Yuki之路好kick：「我都知道佢係安全感唔係好夠嘅人，佢質疑我係咪咁架、係咪咁架，所以都kick㗎。」

潛伏愛的間諜

另之前Yuki在海選中曾因Kris「好似好了解我咁」大為心動，不過過了一輪冷河之後，Yuki忽然清醒，並突破盲腸直指有「愛的間諜」，並表示：「我覺得好奇怪，因為我同你唔係好多接觸，但你講好多嘢都好中（我），我即刻好陰謀論，係咪xxx或者xxx通水？」Kris最後爆出一個連Yuki也意想不到的人名，想知「愛的間諜」真身，以及Yuki對Kris到底有多大懷疑？第二大波折，是Kris原來完全無法忍受目擊Yuki與其他異性約會！事緣Yuki與Kenneth聊天加深了解時，Kris全程雙眼無光兼失落嘟嘴；當發現Yuki與對方傾得投契時，更數度展現各式各樣黯然樣，遭江美儀直指「好失落呀，陰公」、「直情係失戀（咁嘅樣）」。除了神情、Kris的行為亦突顯了他的醋意，事緣當主持人兼媒人阿Bob出來宣布進入下一個回合時，駭然揭發Kris在整段前菜用餐時間內、竟完全沒有碰過他的頭盤菜「生牛肉他他」，不過當Bob追問：「我想問Kris，做咩完全冇食過啲嘢」，為免醋意外露的Kris唯唯諾諾表示：「有食嘅有食嘅。」豈料卻遭阿Bob將那盤恍如剛上枱、就連用以調味的生雞蛋也未有撈勻的「生牛肉他他」舉起反問：「咁呢啲係咩嚟？」事後Kris坦言當刻內心不是味兒：「我嘅對象同第二個傾緊偈，好想專心食飯，但冇辦法，我真係好在意佢哋」、「我不能一心二用，食嘅話又聽唔到佢哋講嘢。」Yuki組的動作題同樣抵死，是要三位勇士透過「壁咚」令Yuki心跳及腎上腺爆標！相關回合對於Kris來說也是一個大波折，皆因當Yuki與其他組員進行壁咚時，Kris全程擰歪面不敢直視，樣子相當難熬。