宋康昊光州民運三部曲

獲選為來屆奧斯卡最佳外語片南韓代表嘅南韓片《逆權司機》，近排喺南韓上映成績驚人，極速衝破8億韓寰票房，榮登韓國史上十大賣座電影之一，而得到如此佳績，主角宋康昊固然係大功臣。
貴為國民影帝，宋康昊近年先後參演多部同民運歷史相關嘅作品，而佢今年憑《逆權司機》再下一城，即使戲未上映都已經預料到，原因多少都因為呢部戲可列為宋嘅「光州民運三部曲」第二章，而搵返佢嘅作品，其實佢同光州事件，早喺2004年已結下不解之緣。

朴正熙的理髮師
2004年，宋康昊主演《The President's Barber》(中譯：總統的理髮師)，故事發生於1963年至1979年，主線講述軍人出身嘅朴正熙造票成功，當選總統並開始極權統治。宋康昊飾演因造票建「功」而水鬼升城隍，成為朴正熙理髮師嘅小人物，同《逆》片一樣，佢無心政治，只求搵錢養活屋企。1979年10月26日，一直以強硬手法壓制民眾運動嘅朴正熙被刺殺，南韓全國多個地區實施戒嚴，當中以光州嘅民眾反抗情緒最為激烈，隨後觸發「光州事件」。

光州事件的無名英雄
當地有大批年輕人上街示威，政府於是血腥鎮壓，而呢個背景就係《逆》片故事嘅開端，片中宋康昊飾演嘅的士司機成功接載德國記者，令政府暴行曝光，流血事件結束。《逆》片時間點結束於南韓1980年代。

為學生平反的人權律師
光州事件結束，但餘波未了，當時由下令流血鎮壓學生嘅全斗煥上台做總統，多名參與過光州民運嘅學生被秋後算帳，引發1981年大學生遭拘留迫害嘅釜山事件，而呢個故事背景就成為2013年《逆權大狀》嘅故事背景。《大狀》故事發生於光州事件後，學生們因光州事件惹官非，最終得到由宋飾演嘅稅務律師宋佑碩，冒險為無辜學生以人權律師身份辯護，而呢個角色正正係以「平民總統」已故南韓前總統盧武鉉為藍本。