張敬軒出席護膚品牌活動，自言從出世開始已有笑紋。
張敬軒昨晚(24日)出席護膚品牌活動，談到護膚之道，他直言，「呢個歲數仲唔勤力啲？搞唔掂呀大佬！」他自爆有一部大絕「回春」機，「要一個禮拜一次，好似返教會咁，知道要返教會，就要做facial。」他笑指據張媽媽透露，他一出世就有魚尾紋或笑紋，「我有一樣嘢唔好，就係飲水飲得唔夠，同埋我哋呢一代藝人train出嚟，好怕去洗手間阻到人做嘢。飲水飲得少，依家會隨着年齡嘅增長乖返啲，多啲養生嘅嘢。」
娶Christy是福氣
張敬軒指近期父母就搬到香港同住，每日都飲阿媽靚湯，將不少奇怪鳥獸動物放進肚裡，「例如有一日我撈到隻海馬，喺兜湯入面。海馬嘅功用係……壯腰健腎。我阿媽話係滋陰嘅，我就話你唔好成日俾啲食完唔知會點樣嘅湯我啦。我阿媽話：滋陰呀死仔！」至於會否推介給趕住生「馬仔」的Tyson Yoshi，他笑言對方經常操肌健身，已精力充沛。他表示事前不是Tyson註冊，但會獻出人生第一次赴外地參加婚禮，「佢人生其中一種福氣就係有Christy呢位太太，Christy各方面都好，又冇脾氣，佢(Tyson)脾氣又大，完美演繹一凹一凸。」
談藝人壓力大
談到欣宜正式復出並亮相內地節目《歌手2025》，他沒有特別過問，但對樂迷是開心事，「我都明，因為自己都會突然間想休息下。與其個腦有咁多諗法、想做嘅事，不如停一停。」他自言今年亦處於半休息狀態，問到做藝人是否壓力很大，他認為每個人面對壓力都有不同，事無大小都可令情緒受困擾，最好方法就是陪伴，切忌是勸對方「唔好唔開心」、「咁少事都唔開心」，給予一點時間調整，「佢哋ready好出返嚟，一定會比之前更好。」被封為樂壇社工，軒公認為，「對年輕人嚟講有啲立場係要佢哋去撞，每個人都要痛醒。所以今年會集中返喺自己先，出歌出碟同啲fans玩下。」
1年前已預留門票
林家謙將於8月舉行個唱，張敬軒得戚表示1年前已預留門票，對於家謙採取抽籤制公開發售門票，他認為現時歌手與觀眾多了互動，可透過不同方法保障令真正喜歡他們的觀眾可入場，免捱貴價黃牛飛，「希望整個行業可想出一些辦法，令大家唔使買黃牛，但實名制暫時係Mission Impossible，要同公開售票網合作，要做實名制，非常之唔容易。」