張敬軒生日，提早與過千歌迷慶祝生日。
今個星期三(1/2)是張敬軒生日，由於軒仔已多年沒有跟朋友或歌迷慶祝，今年一眾歌迷為給他一個驚喜，於是自發在九龍灣展貿中心一場地舉行展覽，為軒仔預祝生日。現場佈置除了有多張軒仔的巨形靚相，歌迷更將軒仔於賀歲片《超神經械劫案下》中角色「有成」製作成蛋糕，認真有心思。
軒仔到場前，已有千多名歌迷於場內等候，迫爆九展，場面墟冚。當軒仔到場後，歌迷的尖叫及歡呼聲震耳欲聾，撼動全場。期間有歌迷點歌，希望軒仔可以唱《賽勒斯的愛》，軒仔爽快答應，在毫無預備的情況下，即興清唱一曲送給歌迷，唱畢後，歌迷亦十分識做，即來一個全場大合唱《櫻花樹下》作回禮。然而，唱到高音部份時，出現走音，全場哈哈大笑，軒仔亦笑過不停謂︰「你哋知首歌難唱啦！」
軒仔清唱《賽勒斯的愛》。
珍惜粉絲的付出
軒仔表示十分多謝大家於過去一年，無論在他的音樂、演唱會及對這次電影的支持，「有時我自己啲歌、演唱會唱得唔好、自己嘅歌做得唔滿意，甚至乎呢套戲有沙石嘅地方，但我呢班fans都好努力去撐我！呢啲係我嘅福氣，所以我好感恩。呢個世界有咁多人、有咁多出色嘅artists，但大家選擇嚟follow我、支持我，好多謝大家。」
軒仔又謂人生有很多階段，人大了，慢慢知道人生當中並非所有事情都是應份，因此會份外珍惜，「唱歌、做演唱會都唔係應份有觀眾、唔係應份有人鍾意自己，咁就會額外珍惜。買我歌迷會嘅product、我嘅唱片、演唱會飛，每一張飛我都知道係你哋生活入面，無論你哋嘅經濟狀況如何，但嗰個金額都係你哋生活日常開支嘅一部份，所以我好感恩大家可能買少咗一件自己嘅心頭好，或者嗰個月慳啲錢去睇我個show，去support我，所有呢啲情意，我都會永遠擺喺心入面。不過有時因為好多情況，冇辦法同每一位朋友影相、簽名，或者傾好耐，但希望大家知道張敬軒心入面係有呢份感情。」
軒仔一向非常愛錫fans。
盼與粉絲一直同行
一向不愛慶祝生日的軒仔坦言，這一次特別想，「三年疫情我開咗三次演唱會，中間都有好多阻滯，但每一次重開，大家嘅氣氛同支持都會加倍，所以好感恩喺呢三年疫情入面，大家喺網上又好、喺各個場合大家俾我嘅support。見到好多新面孔嘅加入，希望大家知道自己喜歡嘅係一個乜嘢人，好似交朋友咁。我成日覺得我同我嘅fans有心靈上嘅交流係好重要。有時我唔係成日出嚟，或者有時唔喺香港，但大家喺生活當中，張敬軒都會起到一個支撐嘅作用，精神層面又好、心靈層面都好，我與大家同在嘅，多謝大家。」
張敬軒盼未來可以繼續陪伴fans。