張與辰搬到新居之後，每天都有「愛回家」的感受。(娛樂組攝)
張與辰昨日到尖沙咀出席活動，他出場時粉絲的叫聲響遍商場，當他唱出《深海》時，全場粉絲伴唱。談到他近日工作連連，他表示有足夠的休息，近日亦瞓夠7小時，非常難得。
他說︰「好多歌迷、朋友，連我媽都擔心我唔夠休息，我平時瞓個鐘都夠用，呢幾日都瞓7小時。(你間屋搞掂晒？)係呀！好舒服，依家日日都渴望返到屋企，想瞓就瞓，想食就食，成個人都好放鬆。(係咪有個STUDIO？)係呀！依家有間房係STUDIO，搬嚟呢度可以分開番工作地方同瞓覺地方，因為之前一直都唔分開，令到自己瞓極都唔夠精神。依家我入間房係休息，入另一間房就係工作，效率高好多！」
他稱很多樂器、器材全都運來香港，可以用自己熟悉的東西去寫歌，現時亦有為歌手作曲及編曲，並稱很快會見到該作品。談到他的工作編到密密麻麻，他表示自己非常珍惜所有工作機會，「因為係人哋願意俾你，所以盡力做好佢，我係好鍾意做嘢，鍾意忙。」談到他清減不少，是否因為工作太忙無法吃食東西，他笑言依舊有吃燒肉飯，但只食半碗，加上做多了運動所致。他又稱今個月的演唱會有跳舞環節，努力練舞，並稱瘦下來也是好事，因為穿衣服可以好看些。
談到今個月的演唱會主題，他表示是以星際為主題，自己當日會以外星人身份出現，呼籲觀眾入場可以cosplay外星人入場。他表示如果當日有3位觀眾打扮有創意，可以入後台簽名及收禮物。他又稱今次的歌單會令大家看到「真正的張與辰」。問到不少網民重看他的作品，他笑言很開心，同時也發現很多作品很想重唱，但當時是覺得最好的演繹，記錄了當下的心情，或者在日後表演再重新演譯。
ADVERTISEMENT
😋請你嘆香港迪士尼20周年下午茶👇立即登記👇
