星期二晚播出嘅《成人教科書》介紹印度文化，並且走訪喺香港紮根多年嘅夏利里拉家族大宅，大到連小主持Koey都話驚蕩失路！
節目搵到夏利里拉家族12歲後人Shahan帶路，去到位於九龍塘佔地超過5萬平方呎嘅大宅，外面睇似間學校，原來最高峰時期有過百位家人一齊住。大宅入面裝潢豪華，有巨型吊燈、超大間用嚟辦宴會嘅活動室，仲有個噴水池！而Shahan仲介紹家中唔同房間，有部份係按輩份使用。雖然間屋咁大，Shahan就話未試過蕩失路，亦好謙虛話如果有人讚佢屋企好大的話，佢只係識講Thank you。值得一提係，Shahan眉清目秀，十足王子一樣！
樓高三層有近百間房
根據資料，呢間大宅喺1969年建成，樓高三層兼有地牢，合共有近百個房間，淨係廚房都有12個！入面仲有健身室、祈禱室及多個可供宴會聚餐的房間等，家族聘請超過40人打理大宅協助運作。
夏利里拉家族喺香港近百年，二次大戰時夏利萊兄弟為英軍做物資供應而發跡，後來進軍地產及酒店業務，據報現時家族資產過百億計。去年夏利里拉家族放售名下渣甸山地皮，當時估值超過7億。
原文刊登於 Yahoo 娛樂圈
