日本城創辦人劉栢輝同車婉婉合唱《會過去的》 網民讚：完勝朱主席！
多年前彭家麗同「朱主席」（商人朱壽仁）喺公開活動合唱《從不喜歡孤單一個》嘅片段，因為朱主席嘅歌喉而成為網上熱話。事隔多年，呢期又有大老闆同歌手合唱嘅片段流出，不過今次反應好唔同！
網民：節拍全部啱晒聲線似羅家英
片段中，車婉婉同一位劉先生喺一個活動上合唱由婉婉同許志安原唱嘅《會過去的》。呢位劉先生一開聲……咦，起碼拍子音準都冇咩甩漏，最勁係首歌好多兩個歌手嘅歌詞交接位，劉生都冇甩轆，似係有練習過。網民普遍認為劉先生嘅表現完勝朱主席，指「唔好講笑 唱得幾好 一入入得幾好呀」、「喂呢首嘢其實唔易唱㗎，唱K試過就知。我覺得難過朱主席嗰首」、「節拍全部啱晒，擺係K房已經好過好多人」、「聲線似羅家英，但音準入beat完全ok。唱得算唔錯 同朱主席唔同level」。
劉栢輝係上市公司國際家居零售創辦人之一（HKJC影片截圖）
片段上面標註指呢位劉先生大有來頭，係本港馬王「浪漫勇士」嘅馬主劉栢輝。劉栢輝係上市公司國際家居零售創辦人之一，公司旗下經營連鎖家品店日本城。劉栢輝於2017年退任為公司名譽主席及執行董事，身為「愛馬士」嘅劉生成為馬主多年，近年名下馬匹多以「浪漫」為名，其中7歲馬「浪漫勇士」更成為去年香港馬王，於2022－24年連續3年贏得女皇盃及香港盃，並勝出去年日本安田紀念賽，歷年來贏得獎金超過2億！
原文刊登於 Yahoo 娛樂圈
劉栢輝名下愛駒浪漫勇士係去年香港馬王（HKJC影片截圖）