千嬅非常健談，開心Share與屋企人的關係和相處。
由王祖藍擔任主持的綜藝節目《有個閨密叫祖藍》，請來楊千嬅做嘉賓，她暢談與老公、仔仔，甚至是奶奶的關係外，更坦率剖析了自己多年來的心路歷程及性格。
千嬅大爆老公是「運動魔人」，即使只是上綜藝節目也當正「真．比賽」：「有次佢特登train咗三個月先去拍，我提咗佢十次呢個係節目、你只係演員，佢就話自己係運動員。」千嬅說到此處即指自己冇嫁錯人：「整整吓佢搞到我都覺得自己係運動員，跟住就唔肯認輸喇，但有次我出咗意外，鬥牛成個飛起咗，就輪到丁生話番我只係演員。」談到祖藍讚丁子高身型弗，千嬅又指老公身形冇祖藍想像咁弗：「佢遮得好咋，話佢Perfect figure又唔係。」
講到丁子高，千嬅不停投訴老公。
為老公移居上海
千嬅強調與丁子高並非一見鍾情，只是愈相處愈發覺自己深受對方影響，並謂現時在上海居住也是因為老公的上海人身份：「當初嚟係因為佢好耐冇見屋企人，佢屋企大家族嚟，每次食飯都成三圍枱。但我爸爸媽媽喺香港，所以都會掛住香港。」
祖藍追問千嬅曾否行奶奶政策，千嬅即分享與奶奶打牌趣事：「打牌我識識哋，但又唔係好識，因為數學真係相當差。初初打我好驚架，奶奶好認真，唔可以亂打。譬如人哋做大牌，但我又唔知亂咁打，結果打出去俾個雞糊截咗人哋一舖150幾番，真係驚過輸架。」
千嬅表示自己很想念香港。