李駿傑Jeremy完成亞博的《Rise In Love Live 2025》演唱會，自言放下心頭大石。(林俊源攝)
MIRROR成員李駿傑(Jeremy)昨晚(4日)於亞博舉行首次售票演唱會《Rise In Love Live 2025》，Jeremy完騷接受訪問分享感受，他表示雖然聲音很沙但很滿足，因這個show籌備已久，全體團隊都付出100%努力和心機，「尋日(3日)綵排都有少少擔心，因為太貪心，準備好多嘢，好焦慮，今日(4日)再綵排先定啲，完成就以似放下心頭大石。」他表示為開騷減磅，連花姐都擔心他太瘦，笑言完成今晚MIRROR的《香港麥當勞50週年i'm lovin' it 音樂會》，就可盡情放肆，最想吃燒肉和去旅行。
苦練兩個月豎琴
Jeremy在演唱會中首次彈奏豎琴，他笑言，「為咗優雅呢兩個字，要攞部豎琴上台！」他解釋因為《阿波羅》最後一句是歌詞提到豎琴，萌生起彈豎琴這概念，並構思配以希臘神話造型，並為此苦練兩個月，「練到起『起枕』，姆指同食指會容易啲，有少少痛，很快就無咩嘢。」
太妍是靈感女神
至於跳唱偶像太妍的《INVU》，Jeremy興奮表示，「因為太妍就係我演唱會繆思女神，因為呢首歌衍生《Rise In Love》概念，因為佢嘅MV同歌俾我感覺好希臘神話。」用韓文唱歌對Jeremy而言難度不高，但他直言最大挑戰是飊高音，花了不少心機練習，好大壓力，自覺演出總算合格。
姜濤假份保安被識穿
昨晚有Anson Lo、Edan、Jer、Stanley和Frankie共5位MIRROR兄弟捧場，Jeremy表示，即使未能親身捧場的隊友都有send訊息為他打氣，「其實好感動，AK本來會嚟，但下晝突然安排了工作，不過佢都有特登過嚟睇我一陣，半個鐘至一個鐘，探吓我就即刻去做嘢，覺得好sweet。所以喺演唱會後段，講多謝MIRROR時，就忍唔住想喊，但我未唱完歌又唔可以喊，就忍住咗。」他完騷返回後台時，Edan立即衝上前擁抱，安慰他不要哭，Jer則大叫「可以食嘢喇！」在亞博為今日音樂會綵排的姜濤，鬼馬地在後台假扮保安，但一眼就被Jeremy識穿，場面溫馨又搞笑。談到選唱Stanley的《Drunk In Love》，他自爆本來想給對方驚喜，但某日到訪大表哥家中，不小心劇透，「我除耳機時，佢問仲咩聽我首歌，我又好誠實答佢要唱佢首歌。」不過他就拒絕挑戰穿網背心，僅露左手臂和腰，問是否扭蛇腰，「係啊，好唔知醜啊！」講完也忍不住尷尬大笑。
喊得比綵排少
Jeremy的父母親友都有捧場，他自爆在後台見到爸媽即忍不住眼淚，「我見到阿媽阿爸都忍唔住爆喊，我喊我阿媽都喊，AM Team提著要笑住喊，因為要影相。」其實他在唱《夢言》時已開始感觸哽咽，「每次唱呢隻歌都會想喊，綵排時已經喊，正式唱已自喊得最少，因為仲有一隻歌。」其後多謝MIRROR到唱新歌《不枉我們一起過》，多次哽咽，「所以我覺得嗰part唱得唔好，突然想喊啲聲又唔好，所以想唱多一次。」他直言是易喊的人，在台上已不斷提自己要忍住眼淚，已算哭得比預期少。他坦言對自己表現不滿意，一個人負責整個演出不容易，希望吸取經驗，下次進步。」當然不得不多謝Unicorns(Jeremy fans暱稱)，尤甚在歌迷會重組後，新歌迷會要在短時間內籌備演唱會和新歌應援。
不排除加推新專輯
全新同名專輯火速售罄，問到會否加推，他表示已跟公司商量，希望盡快有新消息公布，他直言也想為演唱會出碟，「雖然今次得一場，但值得出隻碟去作紀念。」最後，問到完成演唱會後，對「愛」有沒有新看法，Jeremy答道，「我覺得愛唔係單方面嘅付出，而係相對嘅。愛嘅途中會有酸甜苦辣，其實呢啲都係愛會經歷嘅嘢。你要經歷曬，你先會更加愛。呢個就係我今次Rise In Love 呢隻專輯由頭到尾(主題)，大家順住聽嘅時候可以聽到嗰種feel，希望大家 get到。」
ADVERTISEMENT
20周年「全城撐本地消費3重大激賞」！ 即睇活動詳情！
