2025-09-04 23:03:32

杜琪峯瘦身因糖尿一日未死都有靈感拍林雪親解面上黑斑

杜琪峯率領當年有份拍攝《PTU》的演員出席4K 修復版特別放映場映前座談會。(娛樂組攝)

杜琪峯導演(杜Sir)、任達華、邵美琪、林雪、黃浩然今日(4日)出席《PTU》4K 修復版特別放映場映前座談會。林雪表示一部作品事隔廿年再現大銀幕，仍然如此受歡迎，身為戲中的一份子感到難忘。黃浩然希望多些觀眾入場支持，因為有部份收益是撥入鮮浪潮支持新導演。

重看當年林雪fit過以前

林雪被問到重看當年的自己，有沒有覺得自己以前的身形好看些，挺住大肚腩的他說︰「我覺得依家fit啲喎！」杜Sir就指如果以林雪現在的身形去拍，「應該死咗啦！」二人更不時互窒投訴，笑談當年拍攝趣事，林雪重提一個鏡頭慘被撻足48次，卻遭杜Sir指他浪費珍貴的菲林，「所有錢都用咗喺你度！」邵美琪和黃浩然夾計指林雪特登，埸面爆笑。

杜Sir被林雪頂

杜Sir比以往清減，他指自己因為糖尿指數高，不能太肥，所以多做運動，更嘲林雪有本錢，繼而說︰「喂！你個肚腩唔好頂人得唔得呀？明知自己嗰度大！」林雪被問到面上有黑斑，他指是側埋一面瞓覺，加上托住頭思考，導致位置出現黑色素積聚。他更即場拿高衫袖大騷手臂，及拉開衣服展示肚腩表示非常雪白，沒有異樣。

Anson Lo主演新戲 3個月拍10月

杜Sir早前曾透露會找梁朝偉合作，並指與Anson Lo盧瀚霆的新片正在埋尾，問到兩部作品的進度，他說︰「依家四圍找尋唔同project，之前都有講，現今平台好緊要，依家應該要多啲唔同合作地區同單位，我呢輪會跑多啲，希望有唔同發展對香港、年輕一代。我哋都要生存，仲有好多工作緊嘅人，盡量做，line up幾多就幾多。(咁拍緊嗰部呢？)等我走埋呢幾轉翻嚟開。(明年嗰部呢？)明年至算啦。」他指自己未死，還有靈感，所以會繼續拍下去，更笑謂「拍咗3年啦！十日戲。」