林家謙合共10場《White Summer》紅館演唱會圓滿結束，完騷後接受訪問。(林俊源攝)
林家謙合共10場的《White Summer》紅館演唱會於昨晚(31日)圓滿結束。家謙於完騷後接受傳媒訪問，今次個唱請來一眾「姐姐級」歌手任嘉賓，可封為「姐姐收割機」，最後兩場更請來甚少站香港舞台表演的宣萱和張栢芝問到眾位「姐姐」之中，哪位令家謙最有驚喜，他直言是張栢芝，因為對方是人生第一次買碟的女歌手，起初抱住一試心態邀請對方，沒想到栢芝一口答應，他說：「佢太耐冇出嚟唱歌見大家，我當時抱住20%機率希望，問吓啫，問吓冇壞嘅，一問咗佢即刻Ok咗，仲好重視呢件事添，成日追住我嚟攞MMO(音樂伴奏)、點樣練呀。可能太耐冇唱歌，想準備得好啲。當日聽到佢唱，嘩！佢好重視呢件事，好感謝佢。」家謙與栢芝合唱《留給最愛的說話》時，獻上深情獨白致謝，他解釋：「隻歌佢揀，作為一隻舊啲電台歌，點解要爭取呢隻歌，係有原因，今次佢想喺呢個舞台度帶住呢份意義唱呢隻歌，我記得佢最後唱到有少少眼濕濕，好感謝佢投放咗好真實嘅情緒喺呢隻歌。」
驚喜見「真電視人」
問到栢芝是否最令他小鹿亂撞的嘉賓時，家謙表示對著栢芝和宣萱都很緊張，「始終平時無辧法遇見，同埋係電視中嘅人，唔容易真實遇見，佢做電視，我做音樂。」談到尾場請來宣萱驚喜登場，家謙透露原本設計是沒嘉賓，「盲盒打開冇見到嘉賓，想有個Twist（轉折）喺度。有時大家滿心歡喜，以為今天好好天，突然殺出雷暴黑雨，有時打開個盒係『吉』嘅，呢種落空嘅感覺最想喺最尾一場畀到大家。」至於邀請宣萱做嘉賓，家謙解釋第4、5場演唱《普渡眾生》期間，鋼琴未能及時升到舞台，惟有執生找話題拖延時間，「我諗起死啦，講咩好呢？醒起我嗰日我睇宣萱嗰番說話，我儲低咗，因為覺得同我嘅演唱會主題不謀而合，我可分享畀大家。無心插柳地諗起可邀請宣萱嚟睇呢，見起佢之前訪問有聽我嘅歌。咁又諗，咦，佢有聽係咪識唱呢？唔問又唔知，問咗佢又即刻Ok喎。唱咩呢，佢話《難兄難弟》，我話我6歲就係睇《難兄難弟》。」他表示考慮到宣萱不是歌手，要在舞台現身或會太大壓力，故安排她從觀眾席上台較輕鬆。至於楊千嬅任嘉賓惹起部分歌迷微言，家謙自言現場聽不到大家的反應，亦沒有看到相關留言。家謙感恩說：「很慶幸有呢啲姐姐陪伴我童年。」
直認曾為頭場失誤唔開心
談到開騷前失聲，家謙說：「8月睇咗4、5次醫生。瞓唔到，把聲又唔好，恢復唔好，愈嚟愈心急，練唔到歌，有少少無助。(幾時開返聲？)11號先開返聲。」處女座的他自評表現又如何？他笑言，「10分……愛啊！」他起初否認每晚mon po，但當談到不同的「肚臍」留言，就笑言想扮可憐，但都無法禁示大家繼續影，至於尾場的「898」，他就高呼：「喂！唔講得，自己參透。」接著他直認有看網民留言，尤其頭場出現較多舞台失誤，「太多機關要配合，每一隻歌都唔同，非一般嘅複雜。第一晚見到大家回饋我自己係有少少唔開心嘅。整理（心情）後要吸收消化，諗諗有啲位未係做到最好，點樣再調整呢？鋼琴無電又係控制唔到，綵排唔會預計到，唔需要怪責任何人。去到第2、3場見大家鍾意清唱，試吓清唱成段。小小意外令我有得著，inspire我改咗編曲。中間發生嘅小插曲，帶領我去另一個出口。」
「紅館360吊車」申請有難度
問到「紅館360」吊車的高空機關裝置，家謙坦言申請過程有難度，「都頗難，申請好多程序，好後期先確定去做，相信中間要通過好多嘢，確定安全，我都覺得係正常，可以理解。」至於最後兩場開直播，家謙指想添添新意，「最後兩晚諗到開IG Live會唔會好玩呢？好似未試過有歌手紅館開騷同時開Live。」
瘦到腰圍僅得26吋
尾場破例encore，林家謙直言「有諗過encore，但我一直都沒這習俗，頭先見到好多朋友完全唔走，我覺得又太過狠心，所以就心軟咗。」由於觀眾堅持留下，他決定上台再唱，至於首次公開演唱的新歌，家謙直言仍未錄音，也未定到最合適的歌名，至於何時推出，他笑言就先放假休息，又自爆為演唱會瘦到腰圍僅得26吋，暫時未有舉行巡迴演唱會的計劃。9月3日(周三)是林家謙的生日，他半說笑指要去長洲慶祝，大家搭船遇到他也勿打擾。到於問到Tyson Yoshi和Serrini可有相約慶祝時，他爆笑回應：「人哋有老婆仔女。(嘩！)咁講啫，未知係仔定女，貓都係仔仔嚟㗎嘛！」
