林海峰完成50場《笨蕉大劇場》後，笑言時候不早要返屋企瞓覺。(娛樂組攝)
林海峰、葛民輝、柯煒林(Will)和韋羅莎主演的舞台劇《笨蕉大劇團》，昨晚(7日)舉行尾場第50場，林海峰於謝幕時邀請俞琤上台，原來她是今次演出劇目的發起人，她表示劇本改編自一套法國電影，「最初我建議劇本名三七廿一，因為今年是軟硬成軍37周年，喺1988年佢哋仲係跪卜卜的被出茅廬嘅21歲，所以我寄望佢哋經過37年奮勇作戰後，帶著最豐富嘅經驗，亦都不失佢哋無比嘅運氣，做一場好戲娛樂香港人。」
軟硬開演唱會要睇「場紙」
林海峰和葛民輝於完show後接受傳媒訪問，林海峰表示今次可以跟很多重量級演員合作，自己抱住學習心態去演出，很多謝有份參與的人員。葛民輝表示暫時未有太大不捨感覺，笑謂可能到慶功及出糧的時候才會有多些感覺。問到軟硬何時開騷或重演，林海峰表示要有「場紙」：「好多人都入定先，入咗好多年都未必批到。有場紙會即刻考慮，我哋都成軍37年，批到嘅話連續做50場。但係睇下批咩場，總之睇緣份，有場紙先啦。」阿葛笑謂要等羽毛球場。
凡事向好方向想
問到二人對柯煒林患癌，有沒有擔心要修改劇本，阿葛表示個劇本令他打強心針，相信風雨會過，世事、命數都是由天不由人。他自言很幸運，因替代柯煒林的余家溢一直有參與綵排，擔任眾人的替身，所以他亦膽粗粗去嘗試，很多謝他。林海峰稱柯煒林很快重回劇團，亦代表著凡事不用諗到太差，大家可以向好方向去想。
唔想再頒「我最喜愛」獎
對於MIRROR或會缺席叱咤記招，林海峰說：「頒獎禮好多時有啲人會來，有啲人會走，有時走咗未必唔返嚟；有時走咗會返嚟，係來來去去嘅，我覺得係唔知會發生咩事嘅。呢個係頒獎禮嘅特性，無理由一個頒獎禮由第一年開始搞，搞咗廿年三十年都係嗰幾個人攞獎，係無理由。唯一冇變嘅就係台上的頒獎嘉賓，可能係有少少變嘅。歌手、創作嘅單位可能有時活躍啲，有時或者去咗第二度發展，係正常頒獎禮會見到嘅。」談到他也是頒獎單位，多年來頒「我最喜愛」獎項，直至前兩年才暫停，他坦言，「頒獎禮對嚟講好沉重，因為頒咗好多年，一早唔應該頒。」言下之意想缺席？他笑言自己做了多年，早就不應存在於頒獎禮，但又不知還可做甚麼。
ADVERTISEMENT
