梁敏巧自爆悲慘身世 曾因媽媽爛賭輸掉層樓兼遭連累收恐嚇電話
現年30歲嘅梁敏巧（Maggie），畢業於樹仁大學新聞與傳播學系，2019年參加香港小姐競選，以落選港姐身份加入TVB，被安排主持兒童節目《Think Big天地》及《東張西望》外景，成為「東張女神」，近排再憑戀愛真人騷《女神配對計劃》人氣急升。早前佢接受傳媒訪問，期間罕有地講到自己嘅家庭背景，驚爆曾被有賭癮嘅媽媽拋棄、被連累貼街招追數及收恐嚇電話。
梁敏巧細個就開始靠自己教琴搵食
梁敏巧喺訪問中罕有地講到自己嘅家庭背景，表示佢有一個爛賭嘅媽媽，媽媽試過為咗去賭錢，試過好狠心咁將佢同哥哥遺棄喺大廈管理處。因為媽媽沾染賭錢陋習，所以除咗輸掉原本居住嘅單位之外，喺佢入行後仲盜用屋企人資料及身份證作借貸擔保，導致佢無辜地不停收到恐嚇電話及被被人貼街招追數。
梁敏巧喺細個就開始靠自己搵食，擁有鋼琴演奏級嘅佢喺16、17歲開始教琴，讀書時間就係靠教琴同返其他兼職賺取生活費同零用錢。就算而家佢工作繁忙，不過仍然堅持每個星期都教一堂琴。雖然媽媽為佢帶來好大嘅影響及傷害，不過佢都選擇原諒佢，因為「媽媽始終是媽媽，血脈相連」。
另外，梁敏巧喺2019年同爸爸喺內地創業開設琴行，不過可惜撞正疫情，最終生意失敗離場。不過佢並冇因此放棄，佢表示今年會捲土重來，計劃喺珠海開設新琴行，現時準備工作已經完成，希望琴行喺今年10月可以順利開張。
原文刊登於 Yahoo 娛樂圈
ADVERTISEMENT
送 CulinArt 1862 HKD500元餐飲禮券及八月四大購物展入場券！
