2025-07-12 14:45:24

梁釗峰分手前受訪談另一半Karen 直認大男人揀女友要肯講對唔住

梁釗峰於2009年以四人組合C AllStar出道，2011年夥三隊友簽約寰亞走紅，再於2017年休團變個人發展。今年4月突宣布約滿轉做自資獨立歌手，離開合作超過13年的娘家。現年39歲的釗峰，為首支獨立作品《情緒價值補給員》接受雷霆881商業一台《星光背後》專訪。

節目中，釗峰詳述離巢主因指：「我有惰性，呢十幾年太舒適，再簽約又係唔係一樣呢？想趁仲係三字頭闖下，如果再簽約，再過幾年我係唔敢試。」他感激公司多年栽培，亦坦承為跳出安全網感到忐忑，釗峰說：「都要計數，你問我驚唔驚，驚㗎！」節目中，釗峰亦罕有談及感情，他否認早前有指四年半地下情曝光後「見光死」的說法，不過，接受訪問後一周，他與化妝師女友Karen先後證實這段關係分手收場。

釗峰近年迷上越野長跑，談及在樂壇「長跑」的經歷，他於C AllStar年代比其他兄弟跑得快，及至近年被隊友陳健安或是同公司的馮允謙超前，問到釗峰離巢與同公司歌手之間的競爭有沒有關係，他說：「我無諗咁多，成功嘅公司，如果你配合到係天時地利人和，打橫瞓都會紅，啲歌都會OK，我真係無咁諗。」至於兄弟安仔有今天的成績，釗峰一直戥兄弟高興，釗峰：「C AllStar時俾人感覺我突出，因為《天梯》，又或者個人發展我派歌快啲。組合嗰陣會在意啲，或者會有比較，因為大家同一起步點，除咗想兄弟有掌聲，亦想啲掌聲落響自己度。但到2017年休團獨立之後，我打消晒呢啲念頭，會真心戥兄弟開心。」

馮允謙或安仔已成功開了多次個唱，釗峰真心為好友高興：「好記得安仔疫情開咗一個無觀眾嘅網上騷，我響廠睇佢嘅騷，到中尾段，我係畀佢感動到流眼淚，大讚佢『好叻仔呀！』絕對無諗點解佢會開騷先。同佢經歷咁多，真心覺得佢啲歌好聽，嗰刻我亦覺得自己大個仔咗。」至於馮允謙，原來入寰亞後，二人亦成為了好兄弟，釗峰表示：「Jay Fung呢個兄弟同C AllStar有啲唔同，我會稱呼佢係細佬，我緊張佢嘅成績，仲著緊過其他兄弟。我哋係傾偈擔當，係大家嘅『情緒價值補給員』，會互相比意見。譬如之前我計劃獨立離開，佢成日陪住我，認識Jay Fung，係我入寰亞不可多得嘅事，多咗個little bro。」

感情事一向低調的釗峰，早前被揭地下情，事緣其拍拖四年半的圈外女友無預警於社交網上載多張親密合照，之後有報道猜測二人關係「見光死」。節目中，釗峰大談吸引他的異性條件，他說：「最重要心地善良，同埋肯講對唔住，一個肯講對唔住嘅人，係對我有好大吸引力，因為會顧及人感受。」訪問時尚未爆出分手的他指Karen很吻合，他稱：「佢好肯講對唔住，一開始已經好了解我，大家會代入雙方思考，會考慮人哋點諗。我哋唔會隨便發脾氣，只要唔動氣，大家就無事，我哋成日傾呢啲嘢。」

至於Karen公開親密合照令關係曝光，問他有沒有嬲？「我又無！真係無！反而會同佢傾如果呢個階段你想公開，just go ahead。只係後來收到朋友電話話啲相太過親密，先至知咁做或者會影響外間觀感，就同佢講唔好再post啦，反正大家都知道喇。」釗峰除了指事件沒影響二人關係外，亦直認自己大男人。他一直把關係低調處理，只是想保護這段戀情：「大男人？我算呀！我係大男人，因為我驚無能力照顧我身邊嘅人，所以我要逞強！我唔係要你乜都聽晒我講，但我驚你唔聽我講而出咗事，咁我就保護唔到你，我會仲擔心。因為佢唔係圈內人，扯咗佢入嚟，我會好難保護對方。」快「男人40」的釗峰，亦因大男人主義所以未有結婚計劃，「我成日認為事業要達到一個點先會諗（結婚），因為未能夠俾到一個穩健、舒適嘅空間畀你身邊嘅人，所以就唔會諗住。」現階段，釗峰坦言只想專注勇闖其自資獨立歌手的路。奈何訪問後一周，釗峰女友於網上自爆分手，釗峰隨即網上回應證實，更說：「分手，難過事。不要曲解，沒有回應不等於默認這回事。」他亦重申不再回應感情事，希望大家給予空間。