王俊棠自爆同安德尊係好朋友 帶領TVB龍舟隊鎩羽而歸被大王鬧「一人累全家」
今年69歲嘅王俊棠曾經演出多套TVB電視劇，包括《愛．回家之開心速遞》中飾演池子孝父親池富。最近棠哥接受製作人楊紹鴻嘅訪問，講起佢同安德尊多年來嘅「恩怨」！
王俊棠
王俊棠多謝安德尊：大家會記起我
話說王俊棠參與龍舟比賽多年，亦有為TVB龍舟隊帶隊，但多年來成績麻麻甚至不時「包尾」，去年主持龍舟競渡嘅安德尊就曾經喺節目中直指王俊棠「黑口黑面，一人累全家」。被問到有冇得罪「大王」，王俊棠否認之餘又讚對方好人。「其實安德尊係一個好人嚟。佢喺電視咁講，成日講我個名出嚟吸引你哋去注意，『王俊棠呀王俊棠』，成日聽呢個名見到個樣，大家有深刻印象會記起我嘛。其實好多謝佢，好朋友嚟」。
安德尊去年喺龍舟節目中直指王俊棠「黑口黑面，一人累全家」
王俊棠同時解釋點解TVB龍舟隊戰果麻麻，因為公司不時有新人加入，幾堂訓練就要出賽。「TVB啲人流係轉得好快……我哋啲PA可以一返工，下午就走咗，唔做。太辛苦嘛，同埋唔鬧得，你跟住個導演鍾意鬧人就死啦……（楊紹鴻︰唔同我地嗰陣）嗰陣？打你都仲得」。王俊棠有50年龍舟競賽經驗，以往一年到晚由二月爬到十二月，而家新人得幾堂練習，唯有當志在參與。
王俊棠又喺訪問提到入行經過，原來佢多年前做過model，輾轉間喺夜場做守門口，因此被李修賢相中去拍戲。當時王俊棠參演首套電影《流氓公僕》，演出時要全裸上陣喺簷蓬上面跑。當日咁大犧牲，王俊棠話係希望搏下再有下個演出機會。
原文刊登於 Yahoo 娛樂圈
