自從Marvel超級英雄電影崛起後，電影界流行一個字眼──平行宇宙，一個如同系列電影般搵錢嘅東西。所謂「平行宇宙」，就係一群生存於同一空間或平行時空嘅電影角色，近年已有不少導演發展個人電影宇宙，如昆頓塔倫天奴及溫子仁等。查實早喺上世紀，電影圈首個平行宇宙──Universal’s Monsters已經面世，而環球影片早前已正式宣布，reboot版Monsters系列將正名為「Dark Universe」，頭炮作品就係由蘇菲亞寶堤拉、湯告魯斯及羅素高爾主演嘅reboot版《盜墓迷城》。
文：Wing
怪物宇宙怎樣煉成？
環球影業嘅Monsters系列，成型於1920年至1950年，雖然時間上橫跨二戰，但仍然無阻電影業發展。環球由二十年代起已開始推出一系列怪物、怪人電影，高峰期更年產4部以上。Monsters系列主角其實唔係怪獸，而係恐怖怪人，當中不乏經典Horror film人物，包括《Dracula》(1931)嘅德古拉伯爵、《The Wolf Man》(1941)嘅狼人、《Frankenstein Meets the Wolf Man》(1943)、《Frankenstein》(1931)、《Son of Frankenstein》(1939)嘅科學怪人、《The Invisible Man》(1933)嘅透明人及《The Mummy》(1932)嘅木乃伊等。
新宇宙 新製作
2012年時，環球透露將重新推出Monsters系列，重啟多部當年大獲好評嘅電影，及至上月底，終於正式公布Dark Universe詳情，推出相關網站及同名官方Facebook專頁，另外，又發布一段Dark Universe預告片，不少舊有系列人物及相關電影場景都有出現，包括《The Wolf Man》狼人、《The Phantom of the Opera》嘅面具及《Frankenstein》科學怪人等；而傳聞會參演系列電影嘅尊尼特普，亦確定會飾演《The Invisible Man》隱形人，而積維爾巴頓則於系列下部作品《The Bride of Frankenstein》飾演「怪物」，並由真人版《美女與野獸》導演Bill Condon執導。
回到最初的Horror film
99年由史提芬森瑪斯執導、布蘭登費雪及麗素慧絲主演嘅《盜墓迷城》，當年並冇講明係1932年同名電影reboot版，但以此片嘅最初製作概念──低成本驚慄片嚟睇，可以明白重啟嘅目的其實在於重現舊版Horror film風格。當然世事冇咁完美，99年《盜》片最終因班底、劇本換完又換，成本最後由1,000萬美元大幅增至8,000萬美元，幸好部戲票房成績好，令呢個版本以一部荷李活式冒險動作類商業片兼blockbuster作結。時至2012年，華納透露準備reboot《盜》片，不知就裡者，就當係經典冒險動作片再加個「靚佬湯特別演出」咁睇，知內情者就會醒目地知道，木乃伊先係此片的主角。
留意番，木乃伊是重點
新版《盜》片故事同九十年代版三部曲全無關連，故事講述一支現代海豹突擊隊，喺中東沙漠尋獲一位枉死埃及公主嘅棺木，更因而喚醒可怕詛咒令公主復活，帶來惡毒怨念。從飾演埃及公主嘅蘇菲亞寶堤拉角色造型及化妝設計等方面嘅細緻度，以及電影故事主線設計嚟睇，可以知道，呢個全新木乃伊角色非常重要，好大機會隨時「亂入」Dark Universe系列電影。
