阮民安多次就反修例事件發表意見以及參與遊行，今日他再次現身遮打集會，坦言希望美國國會能夠通過香港人權及民主法案。早前他在Facebook表示太太Eva微博成為大陸網民攻擊對象，而Eva於半年前傾好的上海也被取消。
Tommy表示太太的微博至今仍被內地網民攻擊，他說︰「全家人被佢哋留言侮辱，可以見到嗰班朋友仔質素幾咁低劣，當然嗰啲係搞事分子。好老實好多大陸人都知香港發生咩事，我太太一直都在微博分享她的生活日常，我哋係唔會被佢哋攻擊而退縮，唔會因為想講自己嘅嘢而怕佢哋。不過可以改變佢哋幾多人思想，真係唔知，我哋都會盡力，慢慢等佢哋知道香港人嘅訴求。雖然有啲難，但兄弟爬山，各有各做，出得一分力就一分力！」
太太如常在微博更新動向。
他續說︰「老實講，今個月底本身要喺上海搞一個自己嘅pop up舖，我都相信我哋咁高調表態支持香港人，個計劃都會告吹。上個月底嘅時裝show已經被取消咗，呢個唔重要，唔會阻到我出來企喺香港人嘅決心。我哋係唔會後悔，你哋香港人咁團結，為自己爭取番自己嘅嘢，喺呢一刻我唔可能為咗任何利益，任何金錢，所謂失去一啲金錢而唔企香港人呢邊，我覺得係一個好x街行為，仲扮睇唔到，講風涼說話，可能好多人做到，但我做唔到，希望大家加油，大家一直支持下去，我數到好多手足喺度，我Tommy都一定係度！」