舞台劇《Di-Dar》反應熱烈，決定終極加場。
梁祖堯、湯駿業(Ahdee)、邵美君(阿君)、黃秋生、梁業(肥仔@ERROR)及何洛瑤(Sica)等演出的風車草舞台劇《Di-Dar》宣布終極加場。這套早前贏得第33屆舞台劇獎多個獎項的作品，一眾演員得知加場後也表示興奮。
作為老大哥的黃秋生表示：「我未做過又跳舞又唱歌，就連電影、電視劇都未試過，今次應該係第一次，對我嚟講係挑戰。同埋咁嘅年紀同啲後生仔玩下啦，睇下佢哋諗咩，睇下佢哋點樣排戲，走嚟學下嘢啦！真係㗎，點知記兩三句歌詞，都記咗3個禮拜，記到我忟。」
跳舞可有難到你？他直言：「我不知幾驚，次次嚟到又冇人教，就睇下隔離點樣跳，但佢哋話ok吖，幾好呀，我走嚟運桔㗎，後來睇返阿葛(葛民輝)嘅戲，又真係運桔咋喎，又幾好。運桔唔係唔好嘢，係好嘢嚟㗎，聽起上嚟唔識嘅，以為係負面，其實唔係㗎。」
肥仔都跳得幾好
新加入演出的ERROR隊長肥仔，自言緊張，但又被秋生稱讚而開心。「第一次演舞台劇肯定緊張，因為秋生哥喺度。佢大師兄演技超晒班。影poster時同佢傾偈，秋生哥讚我：『你呢個肥仔都跳得幾好喎。』我整個人舒服晒。」
至於上次在台上打側手翻贏盡掌聲的Sica表示：「上次《Di-Dar》有側手翻，今次重演呢啲招數實在係小絕，大絕嚟講會係一啲同信任有關嘅雜耍，平時大家喺陸運會會見到嗰啲，同跳躍有關嘅，我覺得大家睇到會『嘩！』一聲，入場嚟嘩十聲啦！」
加場場次將於2025年8月5日(星期二)中午12時起，於Popticket公開發售。
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
