通常歌手走人之後，舊東家都會有「贈慶」動作。而環球今日就喺報紙賣全版廣告，為久未有新歌嘅張學友最新單曲宣傳。不過呢首「新歌」，原來係Gin Lee同張學友前年推出嘅合唱歌《日出時讓街燈安睡》嘅獨唱版。
《日》合唱版推出時，張學友係以featuring身份參與，而家Gin Lee一走，環球將呢首歌安排同Gin Lee轉會首作同期推出，仲要賣埋全版廣告，做法惹來網友非議。
鄭秀文陳奕迅都試過
歌手過檔後，新東家一定出力谷，以往都有唔少唱片公司趁住呢啲時間「有所動作」，例如多年前鄭秀文轉會華納之後推出新唱片嗰期，Sammi本來效力嘅華星就將舊歌以精選唱片對撼。最經典嘅莫過於陳奕迅，喺佢離巢英皇之前本來已經錄好名為I had a Great Time嘅新專輯，但英皇選擇將呢十首歌打散，放入多張Eason精選碟，變相樂迷要買齊幾隻碟先「砌」得返呢隻未出世就已經被「分屍」嘅專輯。
原文刊登於 Yahoo娛樂LOL，am730獲授權轉
