鄧兆尊自爆曾被家人安排同何超儀相睇 「想賭王配伶王」
鄧兆尊參與主持網上節目《娛樂好好玩》之後，不時自爆自身見聞，觀眾反應相當正面。喺最新一集節目兆尊又玩自爆，原來多年前曾被阿媽（祥嫂洪金梅）安排相睇，對象仲要同樣係娛圈中人嘅賭王千金何超儀！
何鄧兩家父母：賭王配伶王OK架
鄧兆尊指「四太家教非常嚴」，自己就同何家幾位年長嘅千金一齊長大而較為相熟，甚至試過「曾經被我地嘅爹哋媽咪強迫同其中一位千金相睇」。鄧兆尊話同呢位何家千金私底下認識，「去到現場就話『唔係搵啲咁嘢嚟玩呀嘛？』，好，陪佢地玩一日啦」，雙方交換眼神後都知道大家係被迫，於是做場戲俾雙方父母睇。
最妙嘅係何鄧兩家父母並唔知道兆尊同呢位何家千金試過一班人出嚟一齊玩，甚至覺得「賭王配伶王OK架」。鄧兆尊並無透露太多呢位何家千金嘅身份，但網民好快就留言估中答案係何超儀！
而家何超儀同鄧兆尊各有所屬，兆尊都話本身同超儀嘅性格「撞唔埋」、「做兄弟就得」，因此「賭王配伶王」嘅美事未能成真，兆尊都自評呢次相睇係「笑料一則」。
原文刊登於 Yahoo 娛樂圈
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
