重啟版《忍者龜》動畫8月登場 搵Seth Rogen主理應該兒童不宜

《忍者龜》又嚟啦！之前真人版「忍者龜」造型太肌肉，一啲都唔合家歡，依家再次重啟呢個經典系列，唔搞真人版拍返動畫，將於8月4日上映。排暑假檔期，不過都唔一定合家歡適合一家大細入場觀看，因為今次主理人係一向以咸GAG同無厘頭見稱嘅Seth Rogen！

Seth Rogen前作《賤鄰》、《曳曳同學會》等，以年輕人甚至小學生做主角，不過故事就一啲都唔啱小學生睇。而佢主理過嘅動畫電影《洋腸派對》直頭係III級，連成年人睇都覺得咸 。雖然套套都咸咸地，不過超好笑!

配音陣容星光熠熠

主角無人識，不過班配角就超勁！Seth Rogen自己當然會配返一個角色，佢仲搵埋《狂野時速》系列大隻佬趙喜娜（John Cena呀！）、「蟻俠」Paul Rudd、歌壇巨星Post Malone、《賤鄰》老婆Rose Byrne、女笑匠Maya Rudolph及成龍聲演！

咁重本，因為派拉蒙要發展「忍者龜」宇宙。不過呢個星光配音陣容，嚟到香港即時黯淡無光無咩吸引力，雖然有Seth Rogen主理，呢班少年忍者龜好似好笑咗，不過片廠與其不停重啟經典系列，不如開發新故事仲好啦。

原文刊登於 電影LOL