有情有義盧凱彤表示，就算世界再壞，亦願意一世養明哥。
俞琤將首次公開演出，獻給受人愛戴的明哥。
黃耀明《明曲晚唱》音樂會昨晚完滿結束，到場支持的藝人有許鋌鏗、鄧小巧、林日𣌀及東方昇，而演出嘉賓則有俞琤、盧凱彤(Ellen)及于逸堯，Ellen透露有首歌是寫於明哥出櫃後，當時有人支持有人反對，甚至留言傷害，她不明白明哥究竟做錯甚麼事要受攻擊，之後Ellen讀出一封「給明哥的信」，她說：「親愛的明仔，你好嗎？還記得我們第一次我們見面，你戴著寶藍色帽、神秘咁坐喺梳化上聽我同二汶唱歌。而我不知道你是誰，只知道咁靚仔一定係明星。」
盧凱彤願意一世養明哥
對於明哥為社會所做的一切，Ellen大讚對方是一位關心社會、有責任感的音樂人，她續說：「我有躁鬱症時有段時間冇工作能力，你叫我唔使擔心，人山人海會養我，呢句說話比咗好大動力，我要快啲好番，因為我知『人山人海』冇乜錢。之後發生雨傘運動，我冇見過一個歌手會對社會咁憐愛，你教曉我做對嘅事，唔明呢個世界會對你特別苛刻，但今晚600幾人會寵愛你，因為我哋比你嘅善良感染，成為有taste嘅知識份子。」最後Ellen指，明哥是她的David Bowie，笑言：「世界再壞，你都係好靚仔，我預咗要養埋你。」隨後二人合唱《誰》及《親愛的瑪嘉烈》。
首次公開演出獻給明哥
Encore時明哥介紹一位對達明一派十分重要的人物上台，並說：「冇俞琤唔會有達明一派，佢係我一位好朋友、老師，仲有半個鐘佢就生日啦。」俞琤更以ukulele伴奏《春光泎洩》，她透露亡母被明哥俊朗的外型，以及滿溢的才華吸引，是對方的頭號fans，「今晚係佢派我嚟，每年生日我都會同佢慶祝，自從佢唔喺度唔需要再咁做。」最後俞琤再為明哥伴奏一曲《下世紀再嬉戲》。
完騷後明哥指，今次的演出就如《誰》其中兩句歌詞一樣「我不後悔，我不後悔」。此外，明哥每晚都有為佔中人士打氣，有人認為他對佔中人士的支持，就如歌迷們對他不離不棄，問他會否每年開騷答謝歌迷，明哥肯定地表示：「只有仲有體力、仲有聲音、仲有空間，會繼續發聲，因為唔知幾時唔可以再發聲、再唱歌。」