陳家樂與Shiga結婚一周年。
陳家樂、連詩雅(Shiga)於去年4月結婚，並於今年元宵佳節宣布升呢做父母的喜訊。轉眼間，二人已經結婚一周年，昨日，Shiga 在社交網貼出二人去撐枱腳慶祝的合照，相中見身穿白色吊帶裙的Shiga拿着一束鮮花，孕肚已經非常明顯，不過Shiga手腳及面形依然纖瘦，肥肚不肥人，令人羨慕；而另外一張寶麗來合照中，見陳家樂從後攬住老婆，並摸着凸肚，相當恩愛。
日前，陳家樂亦有貼出與Shiga合照，並公開向老婆發表愛的宣言表示：「個個朋友都話我上世唔知做左咩好事，娶左個咁好既老婆，我覺得唔止上世，應該係做左十世善事先可以今世成個大爺咁。#蜜月旅行再等多陣 #你仲有個好重要嘅任務」Shiga即留言表示：「Love you」、「期待」 ，甜蜜度爆燈。 而連詩雅則帖文表示寫道：「A year ago today，眨吓眼就過咗一年，好似係尋日嘅事，緊張咗一整日，事前好多嘅功夫，但係望返轉頭，覺得係個一世都會記得嘅回憶！轉下眼我哋將踏入另外一個身份，希望一切都順利，一家人開開心心，身體健康，繼續互相包容，互相愛護，一齊成長。」
