Kelly一連10場個唱《陳慧琳Season 2 萬人結界演唱會》昨晚（27日）於紅館舉行完成尾場。（蘇文傑攝）
陳慧琳（Kelly）一連10場個唱《陳慧琳Season 2 萬人結界演唱會》昨晚（27日）於紅館舉行完成尾場。Kelly完騷後接受傳媒訪問表示：「好開心呀！終於可以食返啲自己鍾意食嘅嘢。我諗我冇食辛辣麵幾個月，因為一練歌就唔可以食辣，薯片其實我都戒咗，但唔知點解一食薯片，我就生痱滋。」
Kelly談及演唱會多次感動落淚。（蘇文傑攝）
指雷頌德有份邀請馮德倫任嘉賓
講到演唱會多次感動落淚，她回應：「自己都唔知點解一去到一個位就湧晒啲（眼淚）。」被問到今晚演唱會尾場分別有馮德倫和草蜢擔任嘉賓，她表示：「呢個颱風就輪到馮德倫可以嚟，本來佢話有嘢做架！本身係搵唔到佢，但係佢話約雷頌德去飲咖啡，點知雷頌德就叫佢嚟，真係撞正打風，所以佢先嚟到，如果唔係佢已經走咗（有工作安排），所以真係幸運。」講到與馮德倫同台合唱的感受，她說：「馮德倫其實我成日都見，上次演唱會又請咗佢做嘉賓，又請咗佢做MV嘅主角，所以算係成日見面，但如果成個組合（樂隊Dry）就真係好多年。」
Kelly昨晚於紅館舉行演唱會尾場，第10場請來馮德倫任演唱會嘉賓。
大讚蔡一傑腦部手術初登舞台好專業
對於蔡一傑腦部手術切除腫瘤初登舞台任個唱嘉賓，她表示：「真係好犀利，好專業，病完之後即刻操（肌）到咁實，所以真係好佩服佢。草蜢真係好專業，真係殿堂級，睇到佢哋綵排已經跳得好勁。」講到有否向蔡一傑提到不要拼命演出，她直言：「我心裏面梗係咁諗啦！但係我唔夠膽咁樣講，我就唔出聲，因為我見到佢係得。」講到蔡一傑在舞台上答謝Kelly發慰問的訊息，她說：「因為咁啱嗰日我出咗去做活動，係記者朋友同我講蔡一傑有事喎！咁我就即刻嚇一嚇，所以就即刻send message俾佢。」她透露明年四月會擔任草蜢演唱會嘉賓。
蔡一傑(傑仔)自接受腦部手術切除腫瘤後第一次踏上紅館表演。（蘇文傑攝）
回應兒子被指帶女伴撐場
被問到兒子被指帶女伴撐場，她說：「嗰個唔係佢女朋友，係同事個女嚟㗎！（兒子有否帶女伴來撐場？）喺呢個時候，我唔會咁傻講俾人聽㗎嘛！返到去會俾人哋鬧，佢哋大個㗎啦！已經再唔係蝦餃仔，我唔亂咁講嘢㗎！你自己問佢啦！我唔會講㗎！係咪想我死？」她笑言兒子有來欣賞一場的演出。講到兒子的身高是否已經有1.8米，她直言：「係呀！已經高過我。」
立即更新/下載AM730手機APP 體驗升級功能
