陳百祥北上踢波又惹爭議 被搶波後疑似踢對手後腳
呢期香港明星足球隊新聞不斷，先有傳球隊兩大巨頭陳百祥（阿叻）同譚詠麟疑似不和，叻哥同王晶另組「精裝明星足球隊」；後來又有自稱前甲組球員大爆明星足球隊內幕﹐直指曾經聚賭、酒後同人發生爭執甚至北上作賽時有人同各地嘅私伙女友見面。
網傳陳百祥北上作賽不滿對手偷波出腳踢人
近日有網上片段流傳，指「精裝明星足球隊」嘅大佬陳百祥，北上作賽時疑似因為不滿對手偷波，居然出腳踢人。根據片段，身穿紫藍色波衫嘅10號球員，喺被白衫紅褲嘅對手從後偷波之後，居然出腳踢人。雙方一度發生爭執，球證亦向10號球員俾黃牌。睇返精裝明星足球隊小紅書帳戶，陳百祥不時穿著球隊紫藍色10號波衫拍片，似乎代表好波之人嘅10號波衫成為叻哥指定number。
陳百祥被傳「球場惹火」已經唔係第一次，去年作賽時更被指直接將對手準備射12碼嘅波帶到中圈，難怪有網民笑指「球品好好」。喺精裝明星足球隊小紅書嘅片段中，陳百祥曾經話打和好開心，贏就更加好，「輸？冇可能！」，可見叻哥好勝心好強勁。
原文刊登於 Yahoo 娛樂圈
立即更新/下載AM730手機APP 體驗升級功能
