黃澤鋒、陳麗麗及囡囡黃熙恩亮相《流行都市》。
黃澤鋒、陳麗麗及囡囡黃熙恩（小黃妃）昨日(23日)現身《流行都市》，與大王安德尊、謝芷倫大談高齡產婦。58歲的陳麗麗表示將於9月剖腹生B，現時懷孕7個月，表示上一胎是剖腹，所以今胎也是一樣，此時小黃妃就摸摸媽媽肚皮，而且又不時拖住媽媽隻手，非常有愛。不過，小黃妃就有幾聲咳，爸爸不時為她掃背。
與專業團隊協商
陳麗麗談到為何決定人工受孕，並指自己肝有事及有高血壓，「有啲嘢係要調節，醫生都俾咗好多意見。」安德尊問到為何要冒如此高風險，陳麗麗說︰「所以要搵個團隊傾，傾到真係可以成事，先再決定做唔做。(風險高嘛？)其實所有嘢都有風險，我覺得係生理、心理要調節！」黃澤鋒表示決定做人工受孕之前，全家人都有開過家庭會議，商量過會面對的風險。他與陳麗麗亦坦言明白到人工受孕未必會一定成功，亦知道有跟他們一樣年紀的人嘗試過四、五次都是失敗。
百毒不侵
問到他們壓力大不大，陳麗麗表示要取決於自己的心態，而黃澤鋒就認為自己現時會努力搵錢，自己孭起屋企所有責任。他說︰「一個女人去到呢個年紀仲同你生，你要對人好，唔可以諗好多嘢令佢唔安心。」大王續問因為他們的決定，引來不少批評，黃澤鋒說︰「香港人開心啲啦！我成日覺得，好又過一日，唔好又過一日，我哋做好多嘢都會有唔同人俾意見。(有冇騷擾到？)咁又無，如果佢鬧完我開心就由佢。做藝人要帶俾大家歡樂，正面訊息。我哋呢個年紀都百毒不侵，你講咩我都一笑置之。」陳麗麗表示自己不是藝人，但之前已經說了很多，所以也看化了，但會視大家的言論作為意見參考，也視為提點。
小黃妃自爆成日被爸爸激親
大王與謝芷倫隨後問小黃妃平日有甚麼課外活動，她就表現老定答︰「我有英文、攀石、珠心算、游水，仲會教拳！」大王好奇問她如何教，小黃妃表示會跟媽媽一齊教拳。大王續問學這麼多會否令她壓力過大，黃澤鋒表示會量力而為，如果囡囡太辛苦就會不迫她，加上時代不同，要跟小朋友有商有量。大王再問小黃妃︰「爸爸係咪好惡死？」小黃妃望住爸爸笑及點頭，並謂「佢成日激我！激到我好嬲！我咪嬲囉！」
問到日後BB出世，他們一家會如何迎接新成員，陳麗麗表示在日常生活上會跟小黃妃透露之後的改變，繼而調整囡囡的心情，同時她亦大讚小黃妃已經承諾會幫手餵奶，又會分享日後如何照顧妹妹。
陳麗麗勉勵同路人不要灰心
最後大王問到他們今次的嘗試有何感受，陳麗麗說︰「其實香港地仲有好多，好似我哋過咗黃金期，又想要小BB嘅人，我哋收到好多私訊，因為身邊無支持，缺乏數據，亦都怕羞，就算唔係名人沒有輿論，都仲有身邊人，我覺得係好需要屋企人支持，依家有我呢個個案，唔好介懷，勇於嘗試，香港醫療係好好。」黃澤鋒就表示要開心面對，任何事也好，希望在明天，要繼續努力。
