2025-08-12 12:30:00

黃興桂透露尹志強臨終前悲慘生活　米雪拍劇搵醫藥費「所受嘅苦唔會少」

資深體育評述員黃興桂（Peter）同唔少本地體壇中人私交甚篤，Peter近年開設嘅youtube channel不時分享圈中友人嘅故事，早前佢就提及已故香港足球壇「第一中鋒」、人稱尹佬嘅尹志強。

黃興桂盛讚尹志強好人

黃興桂盛讚尹志強好好人，提到自己於90年移民美國後，尹志強曾擔心他Peter唔適應當地生活，提出如果Peter回流的話，可以返香港做明星足球隊經理人。黃興桂指當時明星足球隊有個會址喺沙田世界花園，尹志強應承可以俾Peter一旦返港時居住，最後因為黃興桂未打算回流而作罷。

其後黃興桂趁美國主辦1994年世界盃而舉辦睇波團，尹志強就介紹當年南華足球隊嘅班主之一洪祖杭俾黃興桂認識，結果洪祖杭介紹咗兩大隊人參加黃興桂嘅睇波團，令佢呢盤生意「包底」。

鼻咽癌主診醫生：電療打擊好大

可惜不久之後黃興桂得知尹志強患上鼻咽癌，Peter於是致電慰問，尹佬話自己OK，又指過去踢過好多賽事都可以反敗為勝，而尹志強又真係喺1993年康復。尹志強雖然打勝仗，但係亦有唔少後遺症。尹志強嘅主診醫生係黃興桂舊同學，有次佢叫Peter為尹佬祈多啲祈禱，因為「電療將佢（尹志強）飲同食嘅渠道打擊得好大，飲野食野都好辛苦」。

此外，電療令尹志強嘅鼻骨出現嚴重潰瘍，不時噴血，甚至要將潰瘍的鼻骨削掉。黃興桂形容嗰後日子對尹志強同拍拖26年女友米雪係「噩夢」、「真係好難捱」，甚至指尹佬雖然意志好頑強，但逝世前嘅8年，「係好無奈地、盡力過正常生活，但係過正常生活都唔容易」。