「夜經濟」疑被防火牆定義為成人內容 黃傑龍喺公司睇唔到新聞｜Ray Online
唔怕生壞命，最怕改錯名。人類對「夜經濟」呢個字眼就冇乜誤解，但係AI就可能諗埋一面。話說優質旅遊服務協會主席黃傑龍（Simon）今朝（15日）喺港台《千禧年代》節目評論「夜經濟」，講到北上消費競爭強勁，但係香港夜市仍有主場之利，佢喺公司就想重溫下相關新聞，豈料公司電腦嘅防火牆自作聰明，將有關新聞報道的連結定義為「成人內容」，唔畀佢登入，搞到佢自己都睇返單新聞，令到Simon哭笑不得。
防火牆疑將夜經濟歸類為另類夜生活
財政司長陳茂波日又講夜又講「夜經濟」，似乎都冇乜人聯想到邪嘢，Simon 公司防火牆今次就諗多咗，似乎將「夜經濟」歸類為另類夜生活。其實「夜間經濟」概念早已有之，根據維基百科，夜間經濟係指「當日下午6點到次日早上6點所發生的以居民、工作人群和遊客為消費主體，以文化旅遊、餐飲休閒、購物健身等服務業為主的商業經營活動」，因上班族群喺公餘時間先可以消費遊樂鬆一鬆，催生咗夜經濟呢個市場。