鄧炳強提到會用工作嚟減壓，只要做好同保護到香港就幾辛苦都冇所謂。(資料圖片)
保安局局長鄧炳強平日形象強硬，但佢話自己其實都係一個好感性嘅人，因為要感性先有熱情，有熱情先會對工作有熱誠、去維護自己嘅工作，「對於我追尋真理或者初心仲強烈。」佢又提到自己會用工作嚟減壓，「工作帶畀我壓力吖嘛？我掉返轉頭用工作嚟減壓」，只要完成到工作、保護到香港，就可以紓緩晒啲壓力，做到幾辛苦都冇所謂。
自小覺得警署警長制服「好威」
鄧炳強接受前助理廣播處長周國豐嘅音樂節目訪問時，透露細個屋企斜對面就係西區警署，喺屋企成日都望到警察出入，加上嗰時有好多警察家人活動，「行過見到小朋友就畀我哋入去，有汽水飲、有嘢食」，亦見到警署警長制服有條紅色帶「新郎哥咁樣，好威喎」，所以就覺得做警察係一個好職業。加入警隊之後，佢喺好多崗位都碰到複雜案件同事情，例如香港回歸初期負責查張子強案，過程曲折之外仲要同內地合作，只係初期兩地都要了解對方究竟係唔想合作，定還是法律問題唔容許，經過一輪磨合就變成互相理解嘅團隊，一齊合作喇。
除咗張子強案之外，鄧炳強另一個較大嘅挑戰就係2019年社會事件，佢話當時成個社會都好陌生、承受住好大壓力，不過淨係點樣帶領同事協助社會「由亂到治」已經係好大挑戰，壓力就直頭忙到都冇時間去諗，「見到唔公義嘅嘢就要去處理，見到唔啱嘅嘢，真說話就要講。」佢強調，當時真說話講出嚟雖然會畀好多人攻擊甚至「搞埋你屋企人」，但自己當時作為警務處處長，「如果我唔出嚟頂，咁邊個頂呢？」
被問曾否做臥底：「放蛇」就試過
鄧炳強又重提自己當年睇完電視劇《獵鷹》，就決定跟隨主角劉德華步伐入香港中文大學讀社工系再投身警隊，至於《新紮師兄》播出街嘅時候佢已經成為一個「新紮師兄」喇。《獵鷹》其中一個劇情就講到劉德華被派去做臥底，咁究竟鄧炳強有冇做過呢？佢話「放蛇」就有試過，兼有一段時間係做情報工作，都叫做相關嘅。
