騙案頻生，就連《愛·回家》「群姐」都差啲上當
騙案頻生，就連《愛·回家》「群姐」都差啲上當，好彩遇到立法會主席李慧琼同警務處處長周一鳴提醒！
其實係三人一齊喺立法會拍宣傳片，片中喺立法會「工作」嘅群姐匆匆忙忙咁傾住電話，仲唔小心撞到「一哥」周一鳴。群姐當時傾電話，問對方「你要我轉乜嘢錢啊？」兩人聽到即刻覺得有可疑，問群姐做咩要轉帳。
群姐話收到「公安」來電，聲稱佢個仔喺內地犯案，急需幾萬蚊保釋金，如果唔係就拉個仔坐監。「一哥」即刻提醒群姐冷靜啲，呢啲係典型嘅電話騙案手法。李慧琼亦話公安根本唔會打畀市民，呢啲係騙徒利用市民對親人嘅關心而呃錢。兩人提醒群姐打電話畀個仔核實，發現個仔返緊工，根本冇發生咩事。
收到可疑來電應立刻收線
李慧琼同周一鳴總結騙徒手法層出不窮，特別鍾意針對長者，呼籲市民平時多關心身邊嘅長者。兩人提醒大家收到可疑來電記住保持冷靜、即刻收線、親自核實。如有懷疑，即刻致電防騙易熱線18222。
ADVERTISEMENT
