國泰航空喺機場一號客運大樓抵港層舉行舞蹈表演。(周令知攝)
今年係國泰航空成立80周年，適逢禮拜四係「正日生日」，國泰分別喺機場同鰂魚涌太古坊安排咗兩場表演賀壽，由80名機艙服務員、機師同地勤人員，聯同香港舞蹈團24名舞者舉行舞蹈表演。
吸引唔少市民旅客欣賞
表演第一場中午喺母企太古集團嘅大本營，即係太古坊糖廠街上演，下晝再轉戰到香港國際機場一號客運大樓抵港層，兩場都吸引到唔少市民同旅客欣賞。表演內容由香港舞蹈團編排，並有著名音樂人雷柏熹先生編曲，靈感來源融入大型舞劇《武道》嘅舞蹈元素，由國泰機組同地勤人員身穿歷代制服，回顧品牌歷史演變。
運輸及物流局局長陳美寶早前出席國泰嘅周年晚宴，佢喺社交平台話國泰係香港旗艦航空公司，不但係香港客、貨運連結全球嘅重要橋樑，亦係印證香港航空實力、鞏固支持國際航空樞紐地位嘅重要一員。
ADVERTISEMENT
