Ray Online｜保安局微博專頁獲獎　讚揚直擊颱風蘇拉風眼

保安局今日喺社交網站分享喜訊，原來係局方微博專頁攞獎呀！事緣今年9月颱風蘇拉襲擊香港期間，保安局第一時間發布政府飛行服務隊直擊風眼嘅珍貴相片，得到眾多關注同讚賞，於是喺微博嘅「2023年第三季度政務微博快速響應優秀案例」中被選中獲獎！

獎狀上面讚揚保安局轄下嘅飛行服務隊當時奉命出動前往颱風風眼，探測實時數據畀地面分析同預測，幫助市民應對天災威脅。而保安局發布珍貴嘅颱風風眼相片，獲得多間媒體轉發，飛行服務隊專業同果敢嘅行動都受到廣大網民好評。

保安局指會繼續發放最正確資訊

保安局「小編」話超開心獲獎，再次多謝大家對保安局專頁嘅信任同支持，同埋評審嘅肯定，當然仲有飛行服務隊同事勇敢迎風而行，先可以為大家迅速帶嚟第一手資訊，回應市民所需。「小編」又話會繼續努力，用最新最有趣嘅方式，為大家帶嚟最快同最正確嘅資訊。「Hashtag」仲寫住「#阿媽我哋得咗喇」「#小編豚隊攬住喊咗一陣」。