柴灣寧富街美化市容地帶GPS時鐘嘅市政局標誌「重見天日」。
市政局同區域市政局已經喺1999年12月31號解散，即係俗稱嘅「殺局」，服務由康文署同食環署取代。超強颱風樺加沙吹襲香港之後，唔少地方都布滿雜物、設施被吹爛，而殺局25年嘅市政局亦「重見天日」再現市民眼前，吸引唔少人討論同打卡。
▼寧富街美化市容地帶GPS時鐘▼
市政局標誌面頭仲有膠紙痕
依家由康文署管理嘅柴灣寧富街美化市容地帶，設有一個附有全球定位系統(GPS)對時功能嘅時鐘，原本個鐘兩面對上都各有一個康文署標誌，不過個標誌就不敵強風吹走咗，噚晚落返三號風球之後有一面就露出底層「真身」，即係一個市政局標誌。事隔一晚，今朝早個鐘就直頭連另一面個康文署標誌都甩埋，顯示市政局嘅英文「URBAN COUNCIL」。
Ray喺落波之後到場睇過，見到個鐘基本上都係如常運作，只係上面標誌嗰個位得返啲膠紙同膠紙痕跡，而附近地下就有好多樹枝同樹葉。今朝唔少柴灣同小西灣街坊出門口返工，搭小巴去到轉港鐵就發現到市政局「重現」，網上都有好多人專誠打卡兼掀起一股討論。有網民稱，「消失了超過四分一世紀的名稱和標誌竟因一個樺加沙重見天日」，亦有人透露某啲公共設施仍然有啲市政局標誌設施。
ADVERTISEMENT
立即更新/下載AM730手機APP 體驗升級功能
