「救世」生產專利「中性安全套」，比傳統安全套更有效阻斷病毒傳播。（受訪者提供）
做人最緊要識變通，疫情退卻，口罩嘅需求自然回落，本地口罩生產商「救世」亦馬上轉型，由製造口罩阻隔新冠病毒傳播，改為研發一款「中性安全套(Unisex Condom)」，阻隔體液交換防止性病傳染。同樣係斬斷傳播鏈，呢款安全套就大有學問。
呢款中性安全套係由「救世」同馬來西亞醫療器材製造商Twin Catalyst共同研發，採用咗一項創新專利技術，令到「救世」豪言安全套係全球唯一可以完全隔絕體液交換嘅安全套，真正帶嚟「零風險」性愛。
專利技術隔斷病毒傳播鏈
究竟係乜嘢技術咁巴閉呢？原來呢項專利技術可以令到安全套以黏貼式設計，完全覆蓋性器官同相鄰皮膚，同傳統安全套相比，更加唔易滑落，可以斷絕性病傳播鏈。「救世」話，產品已獲台灣、卡塔爾和科威特等地接洽，亦將會在香港本地生產，本地發售。
新產品除咗做生意，呢款安全套亦都喺促進性自主方面有所貢獻，事關一般安全套都係由男方主動佩戴喺陰莖，但呢款「中性安全套」就不限性別或性取向，男女都可以主動佩戴，女性可以主動佩戴喺陰道，實行自己身體，自己保護。
